Kryeministri Edi Rama duket se është në vështirësi politike, pas dorëzimit të mandateve të deputetëve nga opozita. Pavarësisht përpjekejeve për të trajtuar si opozitë të re, deputetët që po marrin mandatet në emër të PD dhe LSI-së, pavarësisht deklaratave se zgjedhjet e ardhshme do të jenë në 2021, Rama duket se po ndjen presionin e protestave qytetare që drejtohen nga opozita dhe së pari rrezikojnë karrigen e tij qeveritare.
Ndaj në kushte emergjence, Rama ka kthyer sytë nga disa parti, që për vite me rradhë tentoi t’i shkrijë, i ka tallur dhe kurrë nuk respektoi marrëveshjet që nënshkroi me to.
Në lojë ka menduar të paraqesë 23 parti, si për të treguar se nuk është i vetëm. Dhe për këtë ka ri-aktivizuar PSD dhe PDS, të drejtuara nga Skender Gjinushi dhe Paskal Milo, G 99 që komandohet nga Erjon veliaj, komunistët që sa herë ka ditëlindjen ose datën e vdekjes diktatori Enver Hoxha, shfaqen në varreza, dhe disa subjekte të tjera që s’dihet kë kanë kryetar dhe jo më ku i kanë selitë.
Sot në takim me to ka zgjedhur të çojë Taulant Ballën, Sekretarin e Përgjithshëm, ndërsa në përfundim është nënshkruar edhe një deklaratë me disa pika, ku aleatët e ringjallur dhe ato të panjohur garantojnë liderin Rama për fitoren në zgjedhjet e 30 qershorit.
Deklaratë për Shtyp
Partitë politike të mbledhura në një tryezë konsultimi, thirrur nga Partia Socialiste:
– duke analizuar situatën politike në vend,
– duke gjykuar braktisjen e Kuvendit të Shqipërisë nga një pjesë e deputetëve të PD dhe LSI,
– duke konsideruar reagimin dhe mbështetjen e komunitetit ndërkombëtar,
– duke inkurajuar pa rezerva hapjen e negociatave për anëtarësim të Shqipërisë në BE,
– duke mbështetur me të gjitha energjitë funksionalitetin e shtetit dhe normalitetin shoqëror,
– duke këmbëngulur për zbatimin e Reformës në Drejtësi, sundimin e ligjit dhe luftën kundër korrupsionit,
– duke theksuar rëndësinë politike të zgjedhjeve vendore të 30 Qershorit të këtij viti,
DEKLAROJMË SE :
Braktisja nga një grup deputetësh të PD dhe LSI të Kuvendit, të tempullit të demokracisë institucionale, synon të dëmtojë rëndë interesat tona kombëtare dhe strategjike në favor të interesave të ngushta të karrierës personale dhe llogarive partiake.
- Retorika dhe përdorimi i dhunës prej PD dhe LSI për qëllime politike tenton destabilizimin e vendit dhe kaosin shoqëror, duke na kthyer shumë vjet mbrapa, në të kaluarën me ngjarje të rënda të viteve ‘97 e ’98.
- Mbështesim ndryshimet e propozuara të Kodit Zgjedhor dhe thellimin e këtyre ndryshimeve për të garantuar depolitizim të plotë të të gjithë Administratës Zgjedhore, pjesëmarrjen e emigrantëve në proceset zgjedhore dhe përdorimin e teknologjisë për numërimin elektronik të votave në një projekt pilot qysh në zgjedhjet vendore të 30 Qershorit.
- Angazhohemi për të ndërtuar një platformë të përbashkët për një koalicion funksional dhe fitues të zgjedhjeve për organet e qeverisjes vendore.
- I bëjmë thirrje partive politike të të gjithë spektrit pluralist në vend të respektojnë afatet e regjistrimit në KQZ sipas Kodit Zgjedhor.
Partia Socialiste
Partia Social Demokrate
Partia Demokracia Sociale
Aleanca Popullore
Partia Socialiste e Moderuar
Aleanca Demokratike
Partia e Gjelbër
Partia e Unitetit Kombëtar
Partia G99
Aleanca për Demokraci dhe Solidaritet
Partia Ardhmëria Shqiptare
Partia Për Mbrojtjen e të Drejtave të Emigrantëve
Partia Socialpunëtore e Shqipërisë
Partia e Reformve Demokratike Shqiptare
Partia e të Drejtave të Mohuara
Aleanca për Barazi e Drejtësi Europiane
Partia e Punës së Shqipërisë
Partia Komuniste e Shqipërisë – 8 Nëntori
Partia Demokratike për Integrim dhe Prosperitet
Partia Kristiandemokrate
Partia Lëvizja Punëtore Shqiptare
Minoriteti Etnik Grek për të Ardhmen
Partia e Çështjeve Shqiptare
Partia Demokracia e Re Europiane
Partia Lëvizja për Drejtësi e Shqiptarëve
Partia Fronti i Majtë
