Kreu demokrat, Lulzim Basha, ka nisur një takim me qytetarët në Tiranë. Basha ka nisur serinë e takimeve në zonën e Paskuqanit, që është pjesë e Bashkisë së Kamzës.
Në këto takime Basha shoqërohet edhe nga kryebashkiaku Xhelal Mziu, si dhe ish-deputetët.
Kreu demokrat I ka bërë thirrje qytetarëve t’i bashkohen protestës së 16 marsit që do të mbahet në Tiranë. Basha është njohur me problemet e shumta që përballen banorët, një prej të cilëve edhe Semihaja.
Ajo tregoi se nuk merrte ndihmë ekonomike, pasi i thoshin se nuk e kishte përzgjedhur sistemi, se kishte shkollë e ambulancë afër, ndërkohë që ajo jetonte në kushte të mjerueshme.
“Eja dhe shikoje shtëpinë ku jetoj unë, – iu lut ajo Bashës. – eja dhe shikoje. Më kanë lënë 6 muaj pa drita me foshnjen e vogël, asnjë s’e ka vrarë mendjen të ma zgjidhë problemin”.
Kreu demokrat tha se në Bllok marrin më shumë ndihmë ekonomike se në Pakuqan. Kjo tregon se qeveria e ka humbur komplet kontaktin me realitetin.
“Ti e meriton ndihmën ekonomike dhe duhet ta marrësh. Ato para që duhet të marrësh ti sot i merr një oligark. Me lekët e një muaji që ti merr për ndihmë ekonomike, ata i harxhojnë për 10 min drekë. Kjo duhet të ndryshojë të mos e lëmë të bëhet më keq. Ky shtet nuk do t’ia dijë për ty dhe nuk e di që ti ekziston. të kesh besim se ne do ta ndryshojmë këtë situatë. Të gjithë në protestë më datë 16 mars!”, tha Basha.
