Seanca parlamentare në datën 5 mars do të nisë në orën 10:00. Është ky njoftimi që kanë marrë deputetët e PS-së, gjatë një mbledhjeje grupi parlamentar, ku është diskutuar mbi këtë seancë.
Deri më tani nuk kishte një njoftim zyrtar për orën kur do të mbahej seanca, ndërsa opozita ka paralajmëruar zhvillimin e protestave para Kuvendit, sa herë që të ketë seancë.
PD kishte informuar policinë për zhvillimin e protestës, duke kërkuar leje për nisjen e saj prej orës 09:00, të datës 5 mars.
Por Policia e Shtetit ka refuzuar lejen me pretendimin se rrezikohej jeta e deputetëve, ndërsa akuzonte organizatorët për thirrje të dhunshme, ndaj protestës së 26 shkurtit.
Përgjigjia refuzuese ndaj kërkesës së opozitës shkaktoi një debat në distancë mes kryepolicit të Tiranës dhe Sekretarit të Përgjithshëm të PD-së, Gazmend Bardhi, që akuzoi policinë sit ë kapur politikisht.
Ndërkohë, Ministrisë së Brendshme I është kërkuar nga deputetët e PS-së që të marrë masa për zhvillimin e seancës dhe të garantojë sigurinë fizike të deputetëve pjesëmarrës.
Nuk dihet nëse në seancën e 5 marsit do të marrë pjesë Kryeministri Edi Rama, apo do të zgjedhë të mungojë sikundër bëri edhe në seancën e fundit plenare.
