Shërbimi i Çështjeve të Brendshme dhe Ankesave arrestoi 6 inspektorë policie që shërbenin në policinë kufitare në Portin e Durrësit. Arrestimet ndodhën pas dyshimeve se inspektorët e policisë ishin përfshirë në akte korruptive, duke i marrë qytetarëve të ndryshëm vlera monetare për t’I lejuar të kalonin drejt Italisë.
Sikundër raportohet paratë jepeshin kryesisht nga ata qytetarë që nuk plotësonin kriteret që përcaktohen në lëvizjen e lirë Schengen, ndërsa shumat varionin nga 100 deri në 300 euro.
Por nëse një qytetar kishte probleme me ligjin, apo nuk i lejohej të udhëtonte drejt zonës Schengen për shkak të shkeljes së afateve, apo nëse emir i tij ndodhej në atë që njihet si “lista e zezë”, atëherë shuma që paguhej arrinte deri në 1 mijë euro.
SHÇBA njoftoi arrestimin e shtetasve: A.Gj., 53 vjeç, me detyrë Kontrollor në PKK Porti Durrës; G.B., 29 vjeç, me detyrë Kontrollore në PKK Porti Durrës; G.Ç., 51 vjeç, me detyrë Ndihmës Kontrollor në PKK Porti Durrës; D.D., 53 vjeç, me detyrë Kontrollore në PKK Porti Durrës; D.Z., 50 vjeç, me detyrë Kontrollor në PKK Porti Durrës; J.K., 42 vjeçe, me detyrë Kontrollore në PKK Porti Durrës.
Ata dyshohen për kryerjen e veprës penale “Korrupsion pasiv i personave që ushtrojnë funksione publike” dhe “Shpërdorim detyre”.
Gjatë ndjekjes së këtij procedimi janë aplikuar metodat speciale të hetimit, ku rezulton e provuar veprimtaria e kundraligjshme e këtyre punonjësve të policisë, të cilët, në këmbim të vlerave të ndryshme monetare, bënin të mundur kalimin e paligjshëm të personave me probleme, apo kategorisë së shtetasve që nuk u lejohet udhëtimi drejt zonës “Shengen”.
Gjatë kontrollit të ushtruar në kushtet e flagrancës, punonjësve të policisë iu sekuestruan në cilësinë e provës materiale sasi vlerash monetare në lek dhe euro, në vlerën 2.175 euro, që dyshohet se janë përfituar në mënyrë të kundraligjshme dhe korruptive gjatë ushtrimit të detyrës.
