Të paktën 15 persona janë shoqëruar nga policia pas atentatit të ndodhur mbrëmjen e djeshme në Korçë, kur u qëllua me armë automatike ndaj një automjeti.
Fatmirësisht të shtënat nuk shkaktuan dëme në njerëz, ndërsa policia ka nisur hetimet.
Objektiv i atentatit ishte Mateo Aliko, 29 vjeç, i dënuar në vitin 2008 për grabitje me armë, por edhe disa grabitje të tjera.
Në grabitjen e kazinosë, Aliko në atë kohë 18 vjeç, bashkë me dy persona të tjerë, të maskuar dhe të armatosur, pasi kanë marrë paratë, mësohet se janë përleshur me tre persona, të cilët i kanë plagosur.
Një nga pistat e hetimit është edhe e shkuara kriminale e 29-vjeçarit, i cili kishte pak kohë që kishte lënë qelitë e burgut.
Dyshohet se autorët e atentatit nuk janë nga qyteti i Korçës.
