Kreu i Kuvendit, Gramoz Ruçi, ka lajmëruar mbajtjen e një konference për mediat pasditen e sotme, një ditë para protestës së paralajmëruar nga opozita para godinës së Parlamentit.
Opozita do të nisë protestën në orën 10:00, ndërsa Kuvendi ende nuk ka publikuar orën se ku do të nisë seanca.
Zakonisht seancat parlamentare nisin në orën 10:00, por ndoshta për të shmangur një përplasje, gjatë ditës së nesërme mund të ketë zhvendosje në orar të punimeve parlamentare.
Sot me anë të një njoftimi zyrtar në faqen online të parlamentit, Kuvendi njofton se nesër mbahet seanca, por publikon vetëm rendin e ditës dhe jo orarin e diskutimeve.
Mbrëmjen e së martës, Ruçi ishte prezent në takimin e Ramës me ambasadorë, të cilët gjatë ditës së sotme kanë vijuar takimet me drejtuesit e opozitës, Lulzim Basha dhe Monika Kryemadhi.
Ndoshta gjatë pasdites, Ruçi mund të komunikojë vendimin për shtyrjen e seancës parlamentare, përveç mesazheve që pritet të japë për një protestë paqësore dhe pa dhunë.
