Anëtari i Këshillit të Lartë të Drejtësisë Gjin Gjoni ka zhvilluar një vizitë në Turqi, ku ka marrë pjesë në mbledhjen e Këshillit Gjyqësor turk me qendër në Ankara.
Gjoni i ftuar nga KLD turke në mënyrë nominative ka referuar në këtë takim për çështje të rëndësishme të lidhura me ekzistencën e sistemit gjyqësor, si pavarësia dhe paanësia e gjyqësorit por edhe forcimin e shtetit të së drejtës.
Në mbledhje ishin të pranishëm drejtues të lartë si ministri i Drejtësisë së Turqisë, ambasadori i delegacionit të Bashkimit Europian, drejtoresha e projekteve të këshillit të Evropës dhe anëtarët e Këshillit të Lartë të Drejtësisë së Turqisë, si edhe kryetari i gjykatës turke të Kasacionit.
I ulur pranë shefit të zyrës së Këshillit të Europës dhe sekretarit të përgjithshëm të Këshillit të Lartë të Drejtësisë të Turqisë, anëtari i KLD-së, Gjoni ka theksuar edhe rëndësinë e forcimit të rregullave të kodit të etikës së gjyqtarëve dhe gjyqësorit në tërësi.
Gjyqtari shqiptar Gjin Gjoni është zgjedhur President i Rrjetit Ballkanik dhe Euro-Mesdhetar të Këshillave Gjyqësor. Në një mbledhje të bordit të vendeve anëtare të këtij rrjeti, në maj të vitit të shkuar, me votë unanime, 11 gjyqtarët ndërkombëtarë i kanë besuar Presidencën Gjin Gjonit. Votimi për zgjedhjen e Gjonit në krye të këtij organizimi u zhvillua në konferencën e 10-të të Rrjetit Ballkanik dhe Euro-Mesdhetar të Këshillave Gjyqësor. Në këtë rrjet aderojnë këshillat gjyqësorë të 11 shteteve ballkanike dhe euro-mesdheut përfshi dhe Italinë. Këtij rrjeti pritet t’i bashkohen edhe katër vende të tjera europiane.
(Boldnews)
