Dy persona kanë rënë në prangat e policisë së Tiranës, si të dyshuar për grabitjen e 180 mijë Dollarëve disa ditë më parë në oborrin e hotel Sheraton.
Ata janë Marian Gjonpalaj dhe Albert Gjonpalaj, ndërkohë që po merren në pyetje nga grupi hetimor. Para disa ditësh, dy persona me 180 mijë Dollarë u grabitën para Sheratonit sapo dolën nga një Exchange.
Kanë qenë dy autorë që i morën nga dora paratë, qëlluan me shkelm njërin dhe prej tyre dhe u larguan me motor.
Po kështu, të arrestuarit dyshohet se janë të përfshirë edhe në tentativën e grabitjes së një banke në Tiranë, ngjarje e ndodhur më 7 prill të këtij viti në zonën e Kombinatit, ku autorët tentuan t’i merrnin 10 milionë Lekë shtetasit E.Alushi.
Njoftimi i policisë së Tiranës
Tiranë
Specialistët e Komisariatit të Policisë Nr. 6, finalizojnë operacionin “Skafandra”. Ndalohen dy shtetas për veprën penale të “Vjedhjes me dhunë e kryer në bashkëpunim” e mbetur në tentativë.
Sot më datë 01.05.2016 u ndaluan shtetasit:
-Marian Gjonpalaj, 31 vjeç, banues në Tiranë.
-Albert Gjonpalaj, 20 vjeç, banues në Tiranë.
Shtetasit e lartëpërmendur, më datë 07.04.2016 në rrugën dytësore “Llazi Miho” pranë një banke të nivelit të dytë, kanë tentuar ti vjedhin shtetasit E. A., një shumë monetare.
Falë punës së Specialistëve të Komisariatit të Policisë Nr. 6 u bë i mundur identifikimi dhe kapja e atorëve të kësaj vepre penale. Materialet proceduriale ju kaluan Prokurorisë pranë Gjykatës së Shkallës së Parë Tiranë për veprën penale të “Vjedhjes me dhunë e kryer në bashkëpunim” e mbetur në tentative parashikuar nga Neni 139, 25 dhe 22 i Kodit Penal.
