Rreth 40 deputetë dhe 9 Ministra nuk e kanë dorëzuar dokumentin që vërteton pastërtinë e figurës së tyre, në kuadër të procesit të dekriminalizimit. Ndërkohë DAP ka shtuar sportelet për të lehtësuar proçesin e plotësimit të formularit të dekriminalizimit dhe shton se kush nuk e dorëzon, largohet nga detyra.
Në më pak se një javë para përfundimit të afatit zyrtar, vetëm 75% e zyrtarëve shtetëror kanë bërë bërë vetëdeklarimin nëse kanë apo jo të shkuar penale.
KQZ deklaron se mes personave që nuk kanë dorëzuar dokumentin, janë edhe deputetë dhe Ministra.
“Aktualisht nga 1836 funksionarë,kanë dorëzuar formularët e vetëdeklarimit pranë KQZ-së, 1379 ose 75.1 % e tyre. Komisioni Qendror i Zgjedhjeve, në vlerësim të faktit se afati përfundimtar për dorëzimin e formularëve të vetëdeklarimit,është data 4 Maj 2016 dhe numri i subjekteve qëende nuk e kanë dorëzuar, është i konsiderueshëm, kërkon mirëkuptimin e tyre për ta dorëzuar sa më parë formularin”.- deklaron Drilona Hoxhaj, zëdhënëse e KQZ
Ndërkohë Departamenti i Administratës Publike njofton shtimin e dy sporteleve të tjera për formularët e vetëdeklarimit dhe zgjatjen e orarit të punës, ndërsa u kujton zyrtarëve që në 4 maj mbyllet proçesi.
Kush nuk dorëzon formularin largohet nga detyra përfundon njoftimi i DAP.
