Kryeministrit Edi Rama nuk i ka mjaftuar përplasja e hapur dhe pa arsye me gazetarët dhe përfaqësuesit e shoqërisë civile që donin të merrnin pjesë në takimin për Stadiumin e ri dhe u ndaluan, por është përpjekur ta sfumojë ‘incidentin’ me sqarime të tjera për formatin e mbledhjes.
Në një status në facebook, Rama e quan teatër atë çfarë ka ndodhur dhe se gazetarët donin të hynin forcërisht në një aktivitet qeveritar. E sipas kryeministrit, ky takim nuk ishte një dëgjesë publike por një mbledhje e hapur për të informuar publikun.
Dashje pa dashje me fjalët e tij kryeministri ka vërtetuar akuzat e kreut të opozitës, i cili tha se kjo dëgjesë ishte një teatër-bunker, ku flet Rama, përgjigjet po ai dhe vendos po ai.
Rama deklaron se të ftuarit nuk kishin të drejtë fjale (KKT sipas kryeministri me ligj është një organ kolegjial, ku të ftuarit nuk e kanë në asnjë rast të drejtën e fjalës).
Më tej Rama thotë se kjo ‘mbledhje e hapur’ kishte si qëllim informimin e publikut, që me sa duket do të merrte info për Arenën Kombëtare vetëm nga mbështetës të projektit dhe kryeministrit.
“Unë nuk di të ketë ndonjë njeri apo grup njerëzish të quajtur shoqëri civile, që kanë të drejtën të pengojnë fizikisht punën e institucioneve apo të hyjnë të paftuar (ose të përdorin një ftesë nominale, për të hyrë me një çetë nga pas), në një aktivitet të organizuar nga një institucion. Nuk di as të ketë ndonjë gazetar në botën e lirë, që gëzon të drejtën apo akoma me keq, e kërkon forcërisht të drejtën për t’u futur, i paftuar, në një takim apo aktivitet qeveritar.
Jam shumë i keqardhur që njerëz që i thonë vetes shoqëri civile, apo që shkruajnë e komentojnë nëpër media, sot kanë luajtur teatër në dyert e Këshillit Kombëtar të Territorit, dhe kanë vene kujën sikur u shkelën në ndonjë të drejtë!
E vërteta e thjeshtë është se dy prej tyre që ishin të ftuar, nuk pranonin të hynin në aktivitet pa “shokët” që kishin marrë me vete! Aktiviteti nuk ishte një dëgjesë publike (KKT me ligj është një organ kolegjial, ku të ftuarit nuk e kanë në asnjë rast të drejtën e fjalës), po një mbledhje e hapur e Këshillit Kombëtar të Territorit, në mënyrë që publiku të mund të njihej në detaje me projektin e Arenës Kombëtare – përmes medias së pranishme natyrisht po edhe përmes disa përfaqësuesve të ftuar të grupeve të interesit.
Ndërkohë në sallë ishin të ftuar mbështetës dhe kundërshtarë të projektit, me idenë dashamirëse që veçanërisht këta të fundit, të mund të debatonin pas pjesës zyrtare, me arkitektët e stadiumit. Kështu edhe ndodhi në fakt me ata kundërshtues të projektit që erdhën normalisht, dëgjuan normalisht, folën çfarë deshën normalisht. Ashtu sikundër, krejt normalisht, të tjerët nuk u lejuan të hyjnë. Kaq është e gjitha”, deklaron Rama.
