Arben Frroku është arrestuar në Holandë. Burime nga Interpoli konfirmojnë për Boldnews arrestimin e Frrokut i dënuar me burgim të përjetshëm nga drejtësia shqiptare për vrasjen e kryekomisar Dritan Lamaj.
Arrestimi është kryer sot, pasi Frroku është mbajtur disa ditë i shoqëruar në provincën Shiphol të Amsterdamit për vënie në përdorim të dokumentave dhe identiteteve të falsifikuara. Pas verifikimeve sot është konfirmuar që është pikërisht ai dhe është arrestuar në bazë të një urdhri ndërkombëtar kërkimi.
Autoritetet holandeze e kanë arrestuar për efekt ekstradimi, pohojnë burime nga Interpol për Boldnews.al duke shtuar se në pasaportën false Frroku mbante gjeneralitetet e Renato Tsepas.
Verifikimi i identitetit të shtetasit Frroku erdhi pas krahasimit të gjurmëve të dërguara nga autoritet e vendit tonë për partnerët holandezë.
Interpol Haga konfirmoi se gjurmët ishin identike me ato të një shtetasi të arrestuar me dokument (pasaportë) greke të falsifikuar, me gjeneralitetet “Renato TSEPA”, lindur në Korçë.
Policia e Shtetit, në bashkëpunim me Prokurorinë e Përgjithshme dhe Ministrinë e Drejtësisë, kanë nisur procedurat e ekstradimit të shtetasit Frroku drejt Shqipërisë, ku pritet të vuajë dënimin sipas vendimit të gjykatës.
Arben Frroku është dënuar me burg përjetë për vrasjen e ish – Kryekomisarit Dritan Lamaj, në shkurt të vitit 2013.
Fillimisht ai u shpall i pafajshëm nga Gjykata e Krimeve të Rënda ndërsa pas apelimit të Prokurorisë, u dënua me burg përjetë. Frroku arriti të dilte jashtë vendit pak para dhënies së vendimit dhe shpalljes në kërkim.
