Kreu i Inspektorit të Lartë të Kontrollit dhe Deklarimit të Pasurive, Shkëlqim Ganaj, ka deklaruar se gjatë vitit të shkuar janë bërë 84 kallëzime penale pranë organit të akuzës.
Nga këtë kallëzime, 10 prej tyre janë gjyqtarë dhe prokurorë.
“Kanë së bashku rreth 40 milionë euro pasuri të pambuluara me burime të ligjshme financiare dhe të pajustifikuara me dokumentacion ligjor. Ne akoma nuk kemi përgjigje për të gjitha denoncimet që kemi bërë. Për një pjesë prej tyre, 10 prej tyre siç thashë kanë 40 milionë euro pasuri, deri më sot nuk kemi asnjë përgjigje nga Prokuroria.”– shprehet Ganaj.
Ai tha se në 47 kallëzime penale përfshihen zyrtarë të nivelit të lartë drejtues, si deputetë, ish-ministra apo anëtarë të KLD-së. Në raportin e prezantuar sot në Kuvend, Ganaj tha se janë bërë kallëzime edhe për gjyqtarë dhe prokurorë.
Gjithashtu, Ganaj theksoi se vazhdon të ndëshkohen zyrtarët e niveleve të ulëta.
“Zyrtarët e lartë me pasuri disa milionë euro ende nuk gjykohen.”- thekson më tej Ganaj.
Në raportin vjetor të dorëzuar në Kuvend, ILDKPKI raporton se përveç kallëzimeve penale, ka rritur edhe numrin e masave administrative me gjobë ndaj zyrtarëve të të gjitha niveleve. Gjatë vitit 2015, Inspektoriati ka ndëshkuar me gjobë 550 subjekte të ligjit.
Në një investigim të mëparshëm, BIRN raportoi se ILDKPKI kishte kallëzuar 158 zyrtarë gjatë dy viteve të fundit për vepra penale që lidhen me deklarime të rreme, mungesë burimesh të ligjshme financiare dhe pastrim parash. Gati gjysma ose 70 kallëzime janë hedhur poshtë nga Prokuroria, për 55 raste të tjera ky instituticion nuk disponon informacion, ndërsa vetëm 33 dosje janë çuar për gjykim gjatë dy viteve të fundit.
