Partia Demokratike do të bojkotojë për 10 ditë Kuvendin, në shenjë proteste ndaj përjashtimit të deputetit Sali Berisha.
Vendimi është marrë në mbledhjen e sotme të grupit parlamentar të PD-së, ku bojkoti shihej si një nga mundësitë. Grupi ka shqyrtuar sot vendimin e Byrosë së Kuvendit për përjashtimin e Berishës 10 ditë, pas kërkesës së PS-së dhe thirrjeve të tij për armatosje.
PS deklaroi se Berisha ka shkelur rregulloren e Kuvendit dhe Kushtetutën, madje duke i kërkuar prokurorisë të hetojë.
Ndërkohë PD nuk ka vendosur ende nëse do të bojkotojë edhe seancën plenare të së enjtes, përveç punës në komisionet parlamentare.
Mundësinë për një bojkot të mundshëm të parlamentit e paralajmëroi edhe nënkryetari i PD, Edmond Spaho, ditën e premte pas përjashtimit të Berishës nga Byroja. Spaho deklaroi se vendimi i Byrosë ishte hakmarrje për denoncimin që Berisha i bëri Emiljano Shullazit.
