Një dokument u publikuar nga Bashkia e Tiranës në seancën gjyqësore ka rrëzuar kërkesën e shoqërisë civile ku kërkonte pavlefshmërinë e vendimit të KKT për ndërtimin e këndit të lojrave të Parku i Liqenit Artificial.
Dokumenti në fjalë, tregon një leje të dhënë nga Këshilli Kombëtar i Territorit për Bashkinë e Tiranës. Në këtë dokument Bashkia e Tiranës del e regjistruar si një biznes pranë Qendrës Kombëtare të Regjistrimit, me NIPT: K11729002L. Por nëse i bën një kërkim në Qendrën Kombëtare të Regjistrimit, ky NIPT nuk ekziston.
Ndërkohë kjo leje rezulton të jetë e ndryshme nga ajo që ka publikuar Bashkia e Tiranës pak javë më parë. Njëra prej tyre mban datën e 12.02.2016 kurse leja tjetër mban datën 03.03.2016.
Dokumenti në fjalë është publikuar nga kryetari i këshilltarëve të djathtë në Bashkinë e Tiranës, Leonard Olli i cili e dënon këtë leje të falsifikuar për ndërtimin e Parkut të Lojërave.
Sipas Shoqërisë Civile ndërtimi i këndit lojrave për fëmijë është në shkelje të Konventës së Aarhusit për të drejtën e publikut për të pasur informacion, për të marrë pjesë në vendimmarrje si edhe në shkelje të ligjit për mbrojtjen e mjedisit, Për Planifikimin dhe Zhvillimin e Territorit Për Vlerësimin e Ndikimit në Mjedis.
