Një nga njerëzit më të përfolur në botën e krimit, Emiljano Shullazi është shoqëruar sot në Drejtorinë e Policisë së Tiranës rreth orës 21:30 minuta.
Shoqërimi i Shullazit vjen pas akuzave të ish-kryeministrit Sali Bersisha e akuzoi për kërcënim ndaj kandidatit për Rektor të Universitetit të Tiranës, Prof. Dr. Mynyr Koni.
Burime nga uniformat blu, tregojnë për Boldnews.al se Shullazi po merret në pyetje lidhur me një kërcënim të pretenduar ndaj Prof. Dr. Mynyr Koni.
Policia mësohet se ka ushtruar kontroll edhe në banesën e Shullazit, në kohën kur ai ishte duke u shoqëruar për në polici.
Forca të shumta policie kishin blinduar zonën e ish-parkut dhe rrugën e Kavajës ku edhe jeton Shullazi. Burime policore thanë se, kontrolle janë duke u ushtruar edhe në banesat e miqve e shokëve të Shullazit.
Shoqërimi në polici i Emiljano Shullazit ka bërë që miqtë e tij më të ngushtë të shkojnë menjëherë pranë Drejtorisë së Policisë së Tiranës.
Të paktën 30 persona janë parë në grupe të vogla përpara policisë të njohur si miq të tij.
Ata qëndrojnë edhe në baret përballë drejtorisë së policisë.
