Tirana ka zyrtarizuar afrimin e sulmuesit kosovar Drilon Hazrollaj, duke shtuar një tjetër përforcim në repartin ofensiv për sezonin e ri.
Klubi bardheblu njoftoi se 22-vjeçari i bashkohet skuadrës në formë huazimi nga klubi rumun FC Rapid 1923, ndërsa marrëveshja mes palëve përfshin edhe të drejtën e blerjes përfundimtare të kartonit në fund të sezonit.
Hazrollaj vjen pas eksperiencave me Malishevën dhe Rapid Bukuresht, teksa Tirana beson se sulmuesi do të jetë një alternativë e rëndësishme në organikën e skuadrës.
Vlen të theksohet se Rapid 1923 e transferoi futbollistin nga Malisheva për një shumë të raportuar prej rreth 900 mijë eurosh.
Megjithatë, aventura e tij në Rumani nuk shkoi sipas pritshmërive, edhe për shkak të problemeve me dëmtimet. Në 14 paraqitje me Rapidin, Hazrollaj grumbulloi rreth 300 minuta në fushë, pa arritur të shënojë apo të regjistrojë asist.
