Një parcelë me 215 bimë të dyshuara narkotike Cannabis sativa është zbuluar në Kukës, ndërsa Policia ka shpallur në kërkim babë e bir, të dyshuar si kultivues të tyre.
Sipas policisë, gjatë kontrolleve, në njësinë administrative Kalis, në territorin e fshatit Gështenjë, në vendin e quajtur “Zabeli i Madh”, u konstatuan të kultivuara 215 bimë kanabis, të cilat u asgjësuan me djegie.
Sipas hetimeve paraprake, bimët dyshohet se ishin kultivuar nga shtetasit F. R., 63 vjeç, dhe M. R., 29 vjeç, babë e bir, banues në fshatin Gështenjë. Të dy janë shpallur në kërkim.
Sipas policisë, efektivët ushtruan kontroll në banesën e 63-vjeçarit, ku gjetën dhe sekuestruan rreth 3 kilogramë lëndë narkotike kanabis.
Për këtë rast u procedua penalisht në gjendje të lirë edhe bashkëshortja e 63-vjeçarit, V. R., 52 vjeçe, e dyshuar për veprën penale “Prodhimi dhe shitja e narkotikëve”.
Gjithashtu, nisi procedimi penal ndaj shtetasit S. R., me detyrë kryetar i fshatit Gështenjë, për veprën penale “Shpërdorimi i detyrës”.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme.
