Nga Boldnews.al
Një hetim rutinor i Prokurorisë së Elbasanit për abuzimin me pagesat e ndihmës ekonomike në Peqin, hedh dritë qartësisht se si “blihen” votat e familjeve në vështirësi, në favor të Partisë Socialiste në pushtet.
Ajo që ka ndodhur në njësinë Administrative Gjocaj, në zgjedhjet e vitit 2025, nuk është një rast i izoluar. Megjithatë, është një ndër ato tipiket, të cilat opinioni publik i pranon për inerci, nuk i denoncon dhe pasoja është mandati i katërt dhe, ndoshta edhe më shumë, i “Rilindjes” së kryeministrit Edi Rama.
“Jam mandatuar nga më shumë se 800 mijë qytetarë shqiptarë” është kundërvënia-refren e Ramës ndaj mijëra protestuesve që kërkojnë dorëheqjen e tij çdo ditë, nga Bulevardi qendror i Tiranës. Prej më shumë, ata kundërshtojnë metodat e atij autokratike për mbajtjen dhe përdorimin e pushtetit.
Nga këta “më shumë se 800 mijë shqiptarë” që Rama thotë se i kanë besuar lidershipin, me shumë mundësi janë edhe anëtarët e rreth 300 familjeve në periferi të Peqinit, të cilët morën “papritur” ndihmë ekonomike gjatë fushatës elektorale të vitit 2025.
Një pjesë e tyre janë familje të varfëra, të cilave nuk u ishte miratuar kërkesa për disa vite me radhë. Si me magji, ata u kualifikuan të merrnin “thërrime” nga buxheti i Shtetit, saktësisht në kohën kur duhet të përgatiteshin për të shkuar në kutitë e votimit.
Për familjet, vlera e ndihmës ekonomike, që varionte nga 6 mijë deri në 12 mijë lekë të reja, nuk ishte më shumë se një lëmoshë. Por, të gjitha bashkë, arrin në shumën 12.5 milionë lekë të reja ose rreth 130 mijë euro. Shumë, e cila, për Prokurorinë e Elbasanit, është një abuzim i pastër dhe, për të cilën duhet të mbajnë përgjegjësi penale të paktën 7 zyrtarë lokalë.
“Jemi në fushatë, rrit numrin e përfituesve”
Alken Çerma është Administrator i Njësisë Administrative Gjocaj, në Peqin, prej vitit 2023. Ai e prezanton veten si një person jo shumë të aftë me teknologjinë dhe deklaron se ka ngarkuar përgjegjësin e sektorit të Teknologjisë së Informacionit në Bashkinë Peqin, Gerald Sinani, që ta ndihmojë për të plotësuar formularët on-line të aplikimeve për ndihmë ekonomike.
Në Prill të vitit 2025, një banor i njësisë Gjocaj kallëzon në Prokurorinë e Elbasanit se ka mësuar që është regjistruar si përfitues i ndihmës ekonomike, megjithëse jeton prej vitesh në Greqi dhe nuk ka bërë asnjëherë aplikim për diçka të tillë.
Nga veprimet paraprake hetimore, grupi hetimor konstatoi devijanca të theksuara në listën e familjeve që përfitojnë ndihmë ekonomike, sipas dosjes së lexuar nga “Boldnews.al”.
U konstatua se, në periudhën nëntor-dhjetor 2024, pra kur fushata elektorale për zgjedhjet e përgjithshme ishte në hapat e para, në Njësinë Administrative Gjocaj ishin trefishuar familjet që përfitonin ndihmë ekonomike.
Prokuroria e Elbasanit thotë se “nga 110 familje, gjatë kësaj periudhe, numri i përfituesve arriti në 320”.
Administrator Alken Çerma, personi përgjegjës për këto veprime, pranoi paraprakisht se ka pasur disa parregullsi dhe kjo vinte edhe nga fakti që ai, si individ, nuk ishte shumë familjar me përdorimin e sistemit informatik të Drejtorisë së Sigurimeve Shoqërore. Paraprakisht, ai la të kuptohej se mund të kishte ndërhyrje të paautorizuara edhe nga drejtuesi i sektorit IT në Bashkinë Peqin.
Për këto anomali, Çerma pranoi se kishte pasur tërheqje vëmendje nga Drejtoria Rajonale e Sigurimeve Shoqërore në Elbasan, pas një kontrolli të kryer diku nga fundi i vitit 2024.
“Drejtoresha e Sigurimeve Shoqërore në Elbasan, Etleva Mezini, më kërkoi që të ulja numrin e përfituesve të ndihmës ekonomike, pasi ishte rritur shumë”, tha Alken Çerma para grupit hetimor.
Por, ajo që tregoi më tej, zbulon të gjithë historinë që qëndronte pas asaj “anomalie”, me rritjen e numrit të përfituesve.
“Megjithatë, në mars 2025, drejtoresha Mezini më ka kërkuar verbalisht që të rris numrin e pëfituesve, pasi kishte filluar fushata elektorale”, thotë administrator Çerma në prokurori.
Ja ku vijmë tek momenti kryesor i hetimit. Duket se gjithçka është kryer për fushatë elektorale.
“Votën ta dhamë”
“Boldnews.al” meson se, në kuadër të hetimit, Prokuroria e Elbasanit ka sekuestruar telefonin e administratorit të njësisë Gjoçaj, Alken Çerma, si edhe disa zyrtarëve të tjerë lokalë në Peqin. Të dhënat e përftuara nga komunikimet forcojnë dyshimet se rritja e numrit të përfituesve të ndihmës ekonomike është kryer vetëm në funksion të fushatës elektorale.
Në qershor të vitit 2025, kur zgjedhjet kishin përfunduar, një banor i zonës i ankohet administratorit se nuk e kishte marrë pagesën në rregull.
“Nuk më ka kaluar ndihma ekonomike për qershorin, as asistenca. Unë ju respektova, votën jua dhashë”, i shkruan B.Gj, administratorit Çerma.
Më herët, një banore tjetër e zonës, B. K. i ankohet administratorit se institucionet po kryhen diferencime mes qytetarëve që përfitojnë ndihmën ekonomike.
Sipas saj, po përfitojnë asistencë nga Shteti persona që jetojnë prej vitesh jashtë Shqipërisë dhe nuk janë në vështirësi financiare, ndërkohë që të tjerë që e meritojnë janë të përjashtuar nga kjo e drejtë.
Në përfundim të një komunikimi në janar 2025, shtetasja B.K, i thotë Administratorit të Njësisë Gjoçaj: “Saimiri ishte mbrëmë nga unë. Zoti e bekoftë me fitore. Të zura edhe ty në gojë dhe të lavdërova”.
Në dosjen e Prokurorisë nuk jepen më shumë detaje për shtetasin “Saimir”, por nga të dhënat indirekte besohet se bëhet fjalë për Saimir Hasalla, kandidat për deputet në atë kohë dhe aktualisht ligjvënës i Partisë Socialiste, i dalë në zonën e Peqinit.
Në dosje përmendet gjithashtu ndërhyrja e drejtoreshës së Sigurimeve Shoqërore të Elbasanit, Etleva Mezini, për përfshirjen në skemën e ndihmës ekonomike të një vajze nga Peqini, studente në Tiranë.
Kërkesat e familjes së saj për të qenë pjesë e listës përfituese ishin refuzuar më parë, me argumentin se nuk plotësonte kriteret.
Por, në mars 2025, drejtoresha angazhon vartësin e saj, Ardit Çanaku, për të komunikuar me administratorin e njësisë Gjoçaj, Alken Çerma, që ta shtonte vajzën e re në listën e përfituesve.
Administratori nuk ishte në punë ato ditë dhe prokuroria dyshon se Çanaku ka urdhëruar përgjegjësin e Teknologjisë së Informacionit, Gerald Sinani, që të përdorte kredencialet e Administratorit në sistemin elektronik për të kryer regjistrimin.
Në vijim, hetimet e Prokurorisë së Elbasanit zbuluan se pjesë e skemës së dyshuar janë edhe disa punonjës të tjerë të Sigurimeve Shoqërore në qytet.
Përsa është konstatuar deri në këtë fazë të hetimit, gjykata e Elbasanit ka caktuar masën e sigurimit “detyrim për paraqitje” për Alken Çerma, Ardit Çanaku, Nazmi Beqiri, Gerald Sinani, Ligjërie Kotorri dhe Matilda Kalleshi.
