Në Vjenë u shënua dje 250-vjetori i themelimit të muzeut të famshëm të artit Albertina, në një ceremoni ku morën pjesë presidenti austriak Alexander Van der Bellen, kancelari, zëvendëskancelari si dhe ambasadori i Shqipërisë në Austri Fate Velaj.
Pas ceremonisë Fate Velaj, iu drejtua presidentit Van der Bellen ku theksoi kontributin historik të shqiptarëve dhe figurave me prejardhje shqiptare në historinë e Perandorisë Habsburge.
Velaj përmendi ndër të tjera Gjergj Kastrioti Skënderbeu, si një figurë që për dekada pengoi përparimin osman drejt Evropës Qendrore.
Postimi i ambasadorit Fate Velaj:
Dje u festua 250-vjetori i Albertina, një prej muzeve më të njohur të artit në botë.
Në ceremoninë solemne, ku morën pjesë Alexander Van der Bellen, kancelari, zëvendëskancelari dhe përfaqësues të jetës artistike e kulturore të Austrisë, gjatë fjalimeve u theksua disa herë se në fillesat e këtij institucioni të famshëm, 250 vjet më parë, qëndronte Giacomo Durazzo.
Pas ceremonisë, pata rastin t’i drejtohem Presidentit Alexander Van der Bellen me këto fjalë:
“Shqipëria ka qenë dhe mbetet një vend i vogël, por ka dhënë një kontribut të madh në historinë e Perandorisë Habsburge.
E nisim me Gjergj Kastrioti Skënderbeu, i cili për dekada pengoi përparimin osman drejt Evropës Qendrore.
Vazhdojmë me Kontin Giacomo Durazzo, me prejardhje nga Durrësi, një nga figurat që hodhi themelet e Albertina-s.
Pastaj me Karl von Ghega, projektuesin e hekurudhës së Semmeringut, një kryevepër e inxhinierisë evropiane.
Me bankierin Georg Simon von Sina, një nga financierët dhe filantropët më të shquar të Perandorisë Habsburge, me origjinë nga Voskopoja.
Dhe me Alexander Moissi, aktorin e madh që e bëri të pavdekshëm interpretimin e rolit të Jedermann-it.”
