Ambasadori i Shqipërisë në Austri, Fate Velaj, zhvilloi një takim me Dr. Josef Leitner, kryetar i bashkisë së Wieselburg, qytet i njohur në Austri si “Qyteti i Panaireve”, ku organizohet një nga eventet më të rëndësishme të sektorit të bujqësisë në vend.
Gjatë takimit u diskutua mbi mundësinë e zgjerimit të këtij panairi tradicional, duke i dhënë një dimension më të fortë ndërkombëtar dhe duke përfshirë vende nga Evropa Juglindore si pjesë të tij.
Në këtë kuadër, ambasadori Velaj propozoi që Shqipëria të jetë vendi i ftuar nderi (“Guest Country”) në edicionin e vitit të ardhshëm të panairit.
Sipas tij, kjo do t’i krijonte vendit mundësinë të prezantojë zhvillimet dhe arritjet në sektorin e bujqësisë, agroindustrisë dhe inovacionit rural përmes një hapësire të dedikuar ekspozimi.
Po ashtu, u hodh ideja e organizimit të një forumi dialogu mes dy vendeve, ku përfaqësues institucionalë, ekspertë dhe sipërmarrës nga Shqipëria dhe Austria të diskutojnë mbi të ardhmen e bujqësisë, sfidat e transformimit të gjelbër dhe mundësitë e bashkëpunimit ndërkufitar.
Postimi i Ambasadorit Fate Velaj
Sot zhvillova një takim me Dr. Josef Leitner, kryetar i bashkisë së Wieselburg, qytet i njohur si “Qyteti i Panaireve”, ku organizohet një nga panairet më të rëndësishme të bujqësisë në Austri.
Qëllimi i takimit ishte diskutimi i mundësive për zgjerimin e konceptit tradicional të panairit, duke i dhënë atij një dimension më të theksuar ndërkombëtar, me fokus të veçantë në vendet e Evropës Juglindore.
Në këtë kuadër, propozova që në edicionin e vitit të ardhshëm Shqipëria të ftohet si “Guest Country” (Vendi Mysafir). Kjo do t’i krijonte mundësinë Shqipërisë të prezantojë arritjet dhe zhvillimet e saj në sektorin e bujqësisë, agroindustrisë dhe inovacionit rural, përmes një hapësire të dedikuar ekspozimi.
Njëkohësisht, propozova organizimin e një forumi dialogu, ku përfaqësues institucionalë, ekspertë, sipërmarrës dhe aktorë të tjerë nga Austria dhe Shqipëria të prezantojnë vizionet e tyre për të ardhmen e bujqësisë, sfidat e transformimit të gjelbër dhe mundësitë e bashkëpunimit ndërkufitar.
Një iniciativë e tillë do të kontribuonte jo vetëm në forcimin e marrëdhënieve ekonomike dhe kulturore midis Austrisë dhe Shqipërisë, por edhe në krijimin e një platforme të re bashkëpunimi.
Në përmbyllje, i fola për një partneritet midis Wieselburg dhe Lushnje- Divjakë të cilën kryetari Leitner, shprehu gadishmëri.
