Një tjetër rast i pazakontë ka alarmuar banorët e Fierit. Një gjarpër është shfaqur brenda ambienteve të një njësie shërbimi në lagjen “Liri”, pranë kryqëzimit të Sharrës, duke shkaktuar frikë te punonjësit dhe kalimtarët që ndodheshin në zonë.
Sipas personave të pranishëm, zvarraniku u vu re teksa lëvizte në brendësi të biznesit, duke detyruar njerëzit të largoheshin menjëherë për të shmangur çdo rrezik të mundshëm.
Pas sinjalizimit, u bë e mundur ndërhyrja për kapjen dhe largimin e gjarprit, pa pasur persona të lënduar apo dëme materiale.
Ky është rasti i tretë i raportuar në Fier brenda pak ditësh, një situatë që po rrit shqetësimin e qytetarëve për praninë e shpeshtë të gjarpërinjve në zona të banuara dhe pranë aktiviteteve tregtare.
Banorët kërkojnë ndërhyrje nga institucionet përgjegjëse për monitorimin dhe kontrollin e zonave ku po konstatohen gjithnjë e më shpesh këta zvarranikë.
