Protesta në Tiranë, që ka hyrë në ditën e saj të 24-t radhazi, ka vijuar të tërheqë pjesëmarrës jo vetëm nga qytete të ndryshme të Shqipërisë, por edhe nga diaspora shqiptare.
Mes protestuesve të sotëm është edhe një qytetar shqiptar që ka ardhur nga Shtetet e Bashkuara të Amerikës, i cili u shpreh se i është bashkuar tubimit për të mbështetur kërkesat e protestuesve dhe për dorëheqjen e kryeministrit Edi Rama.
“Jetoj në Amerikë prej 18 vitesh. Këtu kam ardhur vetëm si qytetar për t’ju bashkuar popullit dhe për t’i përzënë këta që vetëm kanë vjedhur. Sot në Financial Times ai e ka sharë popullin shqiptar. Unë kam ardhur vetëm për protestën,” u shpreh ai.
Ai theksoi se shqiptarët duhet të jenë të bashkuar dhe se, sipas tij, kryeministri duhet të reagojë ndaj situatës dhe numrit të protestuesve në shesh.
“Kryeministri duhet të shohë se sa njerëz janë në shesh… Ne merremi vetëm me një kërkesë të panegociueshme: dorëheqjen e kryeministrit dhe një qeveri teknike që populli shqiptar të ketë zgjedhje të lira,” shtoi ai.
