Një qytetar, i cili u prezantua si mirditor dhe që prej vitesh jeton në diasporë, mbajti një fjalim emocionues gjatë protestës, duke u bërë thirrje bashkatdhetarëve të tij që të rikthehen në Shqipëri dhe të kontribuojnë për të ardhmen e vendit.
Ai iu referua deklaratës së kryeministrit Edi Rama se “s’ka bir nëne që na merr pushtetin”, duke thënë se ka shumë shqiptarë të ndershëm që sakrifikojnë çdo ditë për vendin.
“Ka bir nëne. Është ai mësues që jep edhe nga jeta e vet për të edukuar nxënësit. Është ai doktor që i thyhet zemra kur i thotë pacientit se nuk ka ilaçe. Është e padrejtë që shqiptarët të trajtohen në këtë mënyrë”, u shpreh ai.
Më tej, i riu ndau edhe përvojën e tij personale si emigrant, duke ngritur pyetjen se përse fëmijët e tij duhej të rriteshin duke folur një gjuhë të huaj dhe larg vendit të origjinës.
“Falënderoj të gjithë diasporën që ka ardhur sot, por u bëj thirrje atyre që nuk janë kthyer ende të vijnë me dinjitet dhe të marrin fatin e Shqipërisë në dorën e tyre. Diaspora e do Shqipërinë pa interes”, tha ai.
Në fjalën e tij, ai përmendi figura të shquara të kombit si Jeronim De Rada, Nënë Tereza dhe Gjergj Kastrioti Skënderbeu, duke theksuar se ata i kanë shërbyer kombit dhe njerëzimit me përkushtim.
“Me fuqinë e Skënderbeut do t’i mposhtni këta pengmarrës”, përfundoi ai mes duartrokitjeve të pjesëmarrësve.
