Deputetja socialiste, Sara Mila, ka deklaruar këtë të enjte se opozita sipas saj po pengon integrimin në BE pasi i ka dëmtuar imazhin Shqipërisë.
Duke shpërfilluar hapur paralajmërimet e Brukselit për korrupsionin dhe sistemin e drejtësisë, deputetja e Ramës thotë se është opozita ajo e cila po dëmton imazhin e Shqipërisë dhe procesin e Reformës në Drejtësi përmes deklaratave në arenën ndërkombëtare, përfshirë Brukselin dhe kancelaritë europiane.
Sipas saj, kjo qasje ndikon negativisht në perceptimin e vendit në rrugën drejt integrimit në BE.
“Ata po përpiqen shumë që të kapen pas një kauze politike, sepse nuk duan me asnjë lloj mënyre që 2030-ta të jetë viti kur Shqipëria shkon në BE. Nuk mund të them dhe nuk dua ta them që nuk e duan BE-në, por mendoj që nuk duan që kryeministri Rama dhe PS do ta bëjnë të mundur këtë ëndërr. Hedhin baltë mbi reformën në drejtësi. Kryesisht mbi procesin e reformës në drejtësi, mbi akuzat që ata i shfaqin pa kurrëfarë fakti dhe evidence, janë thjesht akuza politike, që BE nuk i konsideron, në raportet e tyre. Ata prapë mundohen duke zënë foltoret, duke çuar në veshët e vendeve anëtare, dhe patjetër që krijon dyshimet dhe pikëpyetjet e veta. Shqipëria ka edhe skeptikë. Mund të jenë edhe skeptikë historikë, me një gojëdhënë të opozitës dhe ‘non gratës’, mund të lindin dyshimet e veta dhe mund të marrin më shumë kohë për të vendosur për Shqipërinë. Kjo antireklamë është një shkak ngadalësimi”, ka deklaruar Mila në A2 CNN.
