Autoritetet turke kanë arrestuar një nga figurat kryesore të opozitës në Ankara, në kuadër të një hetimi për korrupsion që lidhet me një kontratë publike.
Ümit Erkol, drejtues i Organizatës Provinciale të Ankarasë për Partinë Republikane Popullore (CHP), u ndalua së bashku me tetë persona të tjerë. Sipas mediave turke T24 dhe Birgün, hetimi është iniciuar nga prokuroria e Izmirit dhe lidhet me dyshime për parregullsi në një kontratë mes bashkisë dhe kompanisë së ndërtimit Izbeton.
Prokuroria e Izmirit ka ngritur akuza që përfshijnë përvetësim fondesh, mashtrim të rëndë, falsifikim dokumentesh zyrtare dhe neglizhencë në detyrat mbikëqyrëse.
Reagimi nga opozita nuk ka munguar. Kryetari i Bashkisë së Ankarasë, Mansur Yavas, e cilësoi arrestimin të pajustifikuar, duke theksuar se: “Ai është një figurë e njohur, me një adresë të qartë dhe një rol publik. Nuk ka rrezik arratisjeje apo manipulimi provash”.
Kreu i Bashkisë së Ankarasë shtoi gjithashtu se “në këto kushte, nuk mund të flitet për drejtësi”.
Ky zhvillim vjen në një moment kur opozita turke përballet me presion të shtuar, pas arrestimit të kryebashkiakut të Stambollit, Ekrem Imamoglu, në mars 2025. Imamoglu, i cili konsiderohej një nga rivalët kryesorë të presidentit Recep Tayyip Erdogan, po përballet me gjyq për korrupsion së bashku me qindra të pandehur të tjerë.
Që prej nisjes së këtij procesi, disa drejtues lokalë të CHP-së, përfshirë edhe kryebashkiakë, janë arrestuar, duke thelluar tensionet politike në vend.
