Ilir Meta ka komentuar zhvillimet më të fundit politike në vend, teksa është ndalur te gjyqi ndaj tij dhe rrëzimin e kërkesës për liri nga Gjykata Kushtetuese.
Në një intervistë të dhënë nga burgu për Syri TV, Meta ka kritikuar sistemin e drejtësisë në vend, ndërsa e ka cilësuar vendimin e gjykatës dhe procesin ndaj tij si të orientuar politkisht.
Ai thotë se institucionet në vend janë të kapura, ndërsa paralajmëron se më 27 Prill, (data kur nis gjykimi në themel i çështjes së tij), drejtësia e kapur për llogari të Sorosit, siç thotë ai, do të dërrmohet në mënyrë transparente.
Pjesë nga intervista:
Z. Meta, a jeni i zhgënjyer nga vendimi i Gjykatës Kushtetuese?
Ilir Meta: Aspak. I zhgënjyer, do isha po të kishte marrë një vendim dinjitoz pasi do më vinte në vështirësi për gjithçka kam denoncuar që nga mitingu historik i 2 Marsit 2020 për kapjen mafioze të Gjykatës Kushtetuese me betimet te noteri te Lana, me bekimin e diplomatëve të korruptuar, tip McGonigal.
Por të gjithë duhet të kuptojnë se pa konsumuar të gjitha fazat e gjykimit të brendshëm, çështja nuk mund t’i drejtohet Gjykatës së Strasburgut.
Ajo që e bën më të turpshme Gjykatën Kushtetuese që shpërndau një komunikatë sorosiste e jashtë çdo standardi profesional, është mos gjykimi i kërkesës sonë kryesore për mënyrën e arrestimit dhe standardet kushtetuese të tij që vetëm Gjykata Kushtetuese ka të drejtë e detyrë të shprehet, jo vetëm bazuar në nenet e Kushtetutës, por edhe parashikimet e Konventës Europiane për këto raste.
Justifikimi banal se për këtë nuk shprehemi ne pasi po e heton Prokuroria është skandaloz, pasi Prokuroria heton për përgjegjësitë penale në shkeljen e ligjshmërisë dhe nuk mund të shprehet kurrë për standardet kushtetuese se nuk e ka këtë përgjegjësi.
Ata thjesht e vonuan gjykimin me 6 muaj përtej afatit të ligjshëm dhe nuk na zhgënjyen me kamikazllëkun e tyre partiak.
Ç’mund të presësh kur më e mira e tyre vajti u betua te noterja te Lana?
Është po kjo Gjykatë që nuk i dërgoi Komisionit të Venecias pyetjen kryesore dhe kyçe për kushtetueshmërinë e zgjedhjeve vendore në 2019, që ishte formuluar nga Shoqata e Kryetarëve të Bashkive të kryesuar nga Voltana Ademi.
Kjo pasi misioni i OSBE-ODIHR-it e kishte bërë të qartë se mosbotimi i dekretit të Presidentit në gazetën zyrtare ishte e paligjshme.
Ç’mund të presësh nga një Gjykatë që i drejtohet Komisionit të Venecias edhe për mandatin e Kryetares së saj?
Ç’mund të presësh nga këta gjykatës që i shkurtojnë jo vetëm koleges së tyre me urdhër partie mandatin kushtetues, por ja shkurtojnë edhe vetes?
Jam edhe më krenar sot për betejën e jashtëzakonshme që kam bërë 6 – 7 vjet më parë që ky institucion të mos kapej e përdhosej në këtë mënyrë nga Rama dhe banda sorosiste.
Kur kjo betejë të pasqyrohet në librin tim të parë me rastin e 10-vjetorit të Reformës në Drejtësi, kam bindjen se ata që më kanë kritikuar atëherë për tone të larta, do më kritikojnë për tolerancë të tepruar ndaj atij grushti të mirëfilltë shteti që ka zbuar nga vendi 1 milionë shqiptarë duke ua bërë drejtësinë të pamundur, ndërsa sigurinë juridike inekzistente.
Kapja e drejtësisë shumëfishoi korrupsionin dhe vetëm vitin e fundit renditja e Shqipërisë u përkeqësua me 11 vende nga Transparency Internacional.
Shikoni nivelin e të ardhurave në raport me PBB që ka mbetur sa 25 vite më parë apo 13 – 16% më pak se vendet e tjera të rajonit.
Bëhet fjalë për miliarda euro që nuk hyjnë fare në buxhetin e shtetit, por të kleptokratit dhe bandës së tij.
Pastaj se ç’ndodh me paratë që hyjnë në buxhet e me tenderat e paracaktuar me sms nga kryekleptokrati, e dinë të gjithë.
Pastaj për të parë rritjen e pandalshme të korrupsionit dhe pastrimit të parave mjafton të shikoni pikiatën e euros.
Më 27 Prill nis gjykimi në themel i çështjes. Ju keni ftuar mediat dhe trupin diplomatik të jenë prezent. Përse do ndihmojë kjo?
Iler Meta: Në këto 19 muaj të rrëmbimit tim kriminal, siç ju e dini, janë dhjetëra gazetarë vendas dhe të huaj që kanë dashur të më intervistojnë, siç ndodh në çdo vend demokratik, madje edhe në Rusinë e Putinit, ku Khodorkovskyt dhe Navalnit, u janë lejuar intervista edhe nga mediat perëndimore.
Mbi 125 kërkesa janë refuzuar deri tani, të paktën në dijeninë time dhe të Tedi Blushit.
Për vite të tëra shqiptarët janë mashtruar nga dhjetëra b(analistë) që paguhen me lekët e inceneratorit që nuk ekziston, për gjoja prova të korrupsionit të Metës.
Këto i paraprinë klimës së rrëmbimit kriminal me bindjen se do “krijonin” prova këtu në paraburgimin më diskriminues që ka ndodhur në Republikën e Shqipërisë.
Akuza që iu shpërnda mediave ka vetëm gënjeshtra dhe falsifikime ndaj personit tim në gjithçka dhe disa herë prokurorët kanë gënjyer edhe gjatë seancës paraprake.
Gazetarët duhet të vijnë që të kuptojnë me faktin se DIA nuk ishte krijesa e Kastriot Ismailaj, por nga fillimi e deri në fund ishte një krijesë amerikane, e provuar kjo me akte e dokumenta zyrtare.
Gazetarët duhet të vijnë të shohin se si janë fshehur dokumenta para gjykatës, se si në vend t’i referoheshin fakteve në shkresa zyrtare të firmosura me saktësi të provuar, prokurorët u janë referuar dëshmive të rreme të bëra pas 8 ose 10 vitesh nga persona që kanë kapërcyer “ylberin politik” për interesa korruptive.
Gazetarët duhet të vinë të shohin se nuk ka asnjë dëshmi kundër Ilir Metës.
Po ka një kallëzim të rremë, i cili është kundërshtuar nga të gjithë personat e pyetur që kallëzuesi u referohet.
Por ky kallëzim është marrë me mjete shtrënguese, pasi një vit para se të bënte këtë kallëzim, “kallëzuesi” kishte një problem serioz me drejtësinë.
Por të gjitha faktet do bëhen publike në seancë.
Ashtu siç ka dëshmitarë në Arbitrazhin e Vjenës ku figurojnë me dy dëshmi të kundërta.
Pra një pro Kastriot Ismailaj dhe tjetrën kundër Kastriot Ismailaj.
Apo të tjerë që janë shpërblyer me shumë kompani e biznese të regjistruar në emër të tyre dhe familjarëve të tyre.
Po kështu, gazetarët duhet të vinë të shohin manipulimin e letërporosive dërguar nga prokurorët politikë të Ramës të mbushura me gënjeshtra ndaj personit tim.
Duhet të vijnë e të shohin se cilat janë pyetjet e bëra dhe a kanë lidhje ato me kontratën ligjore të regjistruar në SHBA dhe Shqipëri.
Duhet të vinë e të shohin se personi kyç që ata pretendojnë se ka bërë gjoja pagesa të paligjshme nuk është marrë asnjëherë në pyetje, por edhe në çdo rast duhet të dorëzojë para drejtësisë amerikane apo shqiptare autorizimin nga LSI, nëse ka patur një të tillë sipas kontratës.
Po kështu, gazetarët duhet të vinë që të qeshin me ekspertizën e punonjëses së Dumanit për shpenzimet e të ardhurat e mia, e cila është shumë zbavitëse.
Kjo drejtësi e kapur deri në fyt nga një armik i popullit dhe kombit tonë për llogari të Sorosit e mafias ndërkombëtare do dërrmohet në mënyrë transparente, sepse as METE nuk është Meta, por as Rebekën nuk e zëvendëson dot me Metën te cështja e DIA-s.
Dihet se Rebeca ishte jo vetëm partnerja, por edhe shefja e Z. Ismaili te DIA, përndryshe si mund ta shkarkonte nga administrator në 1 Dhjetor 2014.
