Edi Rama, ka shpërthyer sërish këtë të enjte në akuza ndaj opozitës.
Gjatë një takimi me socialistët në Asamblenë e PS-së, në njësinë nr.14 në Tiranë, Rama i ka cilësuar përfaqësuesit e opozitës si të paudhë, që denoncojnë aferat dhe narko-shtetin te partnerët ndërkombëtarë dhe po bllokojnë integrimin në BE.
Sipas Ramës, nuk është korupsioni dhe keqqeverisja ajo që po bllokon integrimin, por opozita.
Edhe pse europianët i kanë tërhequr disa herë vëmendje Ramës për korrupsionin në nivele të larta, një ndër pikat kyçe për integrim, Rama ka tentuar tja faturojë fajin opozitës, duke thënë se po tentojnë të dëmtojnë një moment ku, sipas tij, fati dhe historia po i buzëqesh shqiptarëve.
“Nuk lënë gjë pa thënë që ky proces të mos ndodh. Luftë politike ka dhe në vende të tjera, por nuk ja kanë bërë kurrë maqedonasit maqedonasve këtë punë. Kurrë. Që të thonë atje shiko se këta… Ne kësaj nuk kemi ça i bëjmë. Nuk kemi ça i bëjmë ca të paudhëve që nuk e kanë idenë që çfarë po bëjnë.
Po tentojnë të dëmtojnë një moment ku fati, historia po i buzëqesh shqiptarëve. Diçka madhështore dhe gjëja më e jashtëzakonshme që mund të bëjmë për fëmijët tanë. E kundërta është gjëja më dramatike. Që ne të mos ja dalim dot.
Nëse dera mbyllet, do duhen vite pastaj. Isha me ca studentë, të duket sikur je europian se ikën pa vizë, shkon ku të duash, por kur zbret nga avioni nuk je më europiane atje, je i huaj. Ndërkohë që duke hyrë, duke u bërë Shqipëria vend anëtar je vendas në çdo qytet të BE”, tha ai.
