Komisionerja për Zgjerim e Bashkimit Europian, Marta Kos, ka komentuar çështjen që lidhet me ish-zëvendëskryeministren dhe ish-ministren e Infrastrukturës dhe Energjisë, Belinda Balluku, për të cilën shumica parlamentare nuk lejoi heqjen e imunitetit.
E pyetur mbi zhvillimet e fundit, përfshirë hetimet e SPAK dhe rastet që përfshijnë ish-zyrtarë të lartë, Kos deklaroi se Shqipëria ndodhet në një fazë të rëndësishme të reformës në drejtësi.
“Shqipëria ka bërë një punë ekselente dhe është në rrugën e duhur sa i përket reformës në drejtësi. Janë disa çështje, ju përmendët rastin e çështjes Balluku, të cilat ne po i monitorojmë me vëmendje.
Siç e dini, SPAK po bën një punë të shkëlqyer dhe në fakt është normale që ata të hetojnë apo të gjejnë shkelje. Një tjetër element për ne është edhe fakti se përpos çështjeve nën hetim, të rëndësishme janë dhe reagimet. Ne po monitorojmë edhe ato.”, theksoi Kos.
Kos theksoi se institucionet e Bashkimit Europian po ndjekin nga afër situatën, përfshirë edhe çështjet konkrete nën hetim, duke nënvizuar se rëndësi ka reagimi i autoriteteve ndaj tyre.
Sipas saj, sfida kryesore për vendet kandidate nuk lidhet vetëm me ndërtimin e një kuadri ligjor të fortë kundër korrupsionit, por edhe me ndryshimin e perceptimit shoqëror.
“Mund të kesh legjislacionin më të mirë kundër korrupsionit, por nëse ai pranohet nga shoqëria, atëherë kemi një problem tjetër”, theksoi Komisionerja për Zgjerim.
