Policia e Lezhës ka ushtruar kontrolle në disa banesa gjatë mbrëmjes së të dielës, 1 shkurt, pas atentatit ku u plagos 30-vjeçari Sokol Daci. Disa persona janë shoqëruar gjithashtu në polici.
Raportohet se personi që ka shkëmbyer zjarr me autorët nga brenda berberhanes ku ndodhi ngjarja, ka qenë një punonjës policie. Por në dëshminë e tij, ai ka thënë se nuk ka konflikte me njeri.
Ngjarja u regjistrua në vendin e njohur si “Kthesa e Rrilës”, ku persona ende të paidentifikuar hapën zjarr drejt një berberhane duke lënë të plagosur 30-vjeçarin, që rezulton dhe pronari i biznesit.
Daci ka marrë tre plumba në trup dhe është nisur drejt spitalit të Traumës për ndihmë mjekësore, ndërkohë 3 autorët dyshohet të jenë larguar në drejtim të paditur me një automjet tip “Audi”.
Bashkë me Dacin, në berberhane, ka qenë dhe një polic, i cili ka deklaruar se nuk i ka parë autorët të cilët kanë qëlluar me armë zjarri.
Gjithashtu, mësohet se i pranishëm ka qënë edhe një pjesëtar i fisit Nikulaj, i cili dyshohet se ka mbetur po ashtu i plagosur, por nuk është paraqitur në spital për të marrë ndihmë mjekësore.
Identiteti i autorëve ende nuk dihet, ndërsa ka dyshime se Daci nuk ishte shënjestra e atentatit.
