Rruga e fshatit Besh-Kodër, në Tiranë, është e bllokuar prej disa ditësh, duke pamundësuar qarkullimin e automjeteve dhe duke izoluar banorët e zonës.
Situata vijon të mbetet problematike, ndërsa deri më tani nuk është marrë asnjë masë konkrete për zgjidhjen e saj.
Sipas banorëve, rruga, e cila shtrihet për rreth 3 kilometra dhe lidh fshatin me rrugën e Arbrit, është bërë e pakalueshme për shkak të grumbullimit të baltës dhe ujit. Ata denoncojnë se mungesa e ndërhyrjes serioze ka sjellë bllokimin total të fshatit, ku asnjë automjet nuk mund të kalojë.
Qytetarët shprehen se Bashkia e Tiranës ka ndërhyrë vetëm në mënyrë simbolike, duke hequr një sasi të vogël balte, por pa zgjidhur shkakun e problemit.
Përkundrazi, sipas tyre, pas ndërhyrjes rruga është përmbytur nga uji, duke e bërë edhe më të vështirë kalimin.
“Kjo nuk është normale. Rruga ka bllokuar gjithë fshatin, makinat kanë mbetur të bllokuara dhe askush nuk merr masa për këtë problem. Edhe pasi erdhi bashkia, situata vetëm u përkeqësua”, shprehet një banor në denoncimin e tij për JOQ.
Banorët e Besh-Kodrës kërkojnë ndërhyrje të menjëhershme dhe efektive nga institucionet përgjegjëse për pastrimin, sistemimin dhe riparimin e rrugës, në mënyrë që të rikthehet qarkullimi normal dhe të shmanget izolimi i plotë i zonës.
