Kryedemokrati, Sali Berisha, ka deklaruar këtë të hënë se skandali i tenderave të AKSHI-t, është sipas tij afera më e madhe korruptive, me protagonist Edi Ramën.
Nga protesta te kryeministria, Berisha u shpreh se Daniel Shima dhe Gerond Meçe janë rrëmbyer sipas tij nga familja Rama dhe janë dërguar në bodrumet e Suel Çelës, ku u është kërkuar të tërhiqen nga tenderat.
Sipas Berishës, me urdhër të Ramës, Prokuroria nuk ka nisur hetimet në lidhje me këto raste
“Janë një bandë. Këta janë një bandë që nuk e ka parë ndonjëherë kjo tokë as në Europë dhe botë. Daniel Shimën e rrëmbyen vetëm një javë pas rrëmbimit të Gerond Meçes. Siç mund ta keni ndjekur në dalje para shtypit në rrjetet sociale kam ngritur zërin disa herë për këtë njeri që e mbajtën në bodrume e Suel Çelës, i thyen kockat.
Asnjë zë nuk dilte, asnjë fjalë. Dhe ky ishte rrëmbyer një javë pas Gerondit. Gerondi pat mençurinë dhe u dorëzua tek autoritetet gjermane. Që natyrisht bën atë që u takonte. Po ky tjetri që u dorëzua te autoritetet shqiptare. Altin Troplini e ka përcjellë dosjen te Prokuroria e Tiranës paçka se ishte një akt makabër. Një rrëmbim nga 4 persona. E ndjekur gjer te tuneli i Qafë Krrabës. Natyrisht Prokuroria e Tiranës bëri atë që i thanë firmosi mos-hapjen e hetimeve për personin. Shikoni ku jetojmë”,- është shprehur Berisha.
