Byroja Kombëtare e Hetimit ka reaguar pas deklaratave të kryeministrit Edi Rama, i cili u shpreh këtë të diel se disa agjentë të BKH-së, i kishin shkruar në Kryeministri me armë duke mos respektuar sipas tij rregulloren e sigurisë së lartë të Gardës së Republikës.
Në përgjigje BKH hedh poshtë pretendimin e Ramës, teksa sqaron se agjentët e BKH-së kanë shkuar në kryeministri për ekzekutimin e masës ndaj Belinda Ballukut dhe në momentin që janë informuar se nuk lejoheshin armët brenda institucionit qeveritar i kanë dorëzuar në dollapët e posaçëm të kësaj godine.
Sipas BKH-së nuk ka pasur përplasje me punonjësit e Gardës, ashtu siç pretendonte Rama.
“Më datë 20 nëntor 2025, tre hetues të Byrosë Kombëtare të Hetimit (BKH) janë paraqitur në ambientet e Këshillit të Ministrave për ekzekutimin e vendimit të Gjykatës së Posaçme së Shkallës së Parë, nr. 118, datë 19.11.2025, përmes të cilit është vendosur masa e pezullimit nga ushtrimi i detyrës ndaj Zëvendëskryeministres, znj. Belinda Balluku.
Në hyrjen e brendshme të Këshillit të Ministrave, hetuesit janë informuar nga Garda e Republikës se sipas rregullave në fuqi, nuk lejohet hyrja me armë zjarri në ambientet e brendshme të institucionit. Njëri prej hetuesve ka kërkuar sqarim mbi mënyrën dhe vendin e depozitimit të armëve. Garda e Republikës i ka orientuar që armët të liheshin në dollapët e posaçëm të sigurisë, në hyrje të institucionit.
Pas verifikimit se ambienti i depozitimit ishte i sigurt dhe i monitoruar me kamera, hetuesit kanë depozituar armët dhe kanë vijuar normalisht me kryerjen e veprimeve procedurale.
Theksojmë se në asnjë moment nuk ka pasur debat apo përplasje mes hetuesve të BKH-së dhe Gardës së Republikës.
E drejta e hetuesve të BKH-së për mbajtjen e armës së zjarrit mbështet tek ligji nr. 25/2019 “Për organizimin dhe funksionimin e Policisë Gjyqësore”, ku neni 31, pika 3, parashikon shprehimisht se oficerët e Policisë Gjyqësore, përfshirë ata të Byrosë Kombëtare të Hetimit, pajisen me armë zjarri sipas legjislacionit në fuqi për përdorimin e tyre”, thuhet në reagim.
