Kryetari i Partisë Demokratike, Sali Berisha, ka folur pas tensioneve të shfaqura në mbledhjen e Kryesisë së PD, duke mohuar se brenda partisë ka përçarje. Ai e cilësoi takimin si “jashtëzakonisht të rëndësishëm dhe pozitiv”, duke garantuar se PD mbetet e bashkuar në misionin e saj.
Berisha akuzoi disa ish-anëtarë të PD se pas zgjedhjeve kanë zgjedhur të punësohen në administratën e qeverisë, duke i cilësuar si “demokratë që hanë turpin me bukë”. Sipas tij, të tjerë kanë vendosur të tërhiqen nga politika për të ndjekur jetën e tyre, ndërsa disa të tjerë “flirtojnë me qeverinë për kontratat që kanë”.
“Unë dua t’ju them se kjo parti ka dhe do të ketë vetëm një qëllim: idealin e lirisë dhe rikthimin e votës së lirë. Kontrata jonë është me qytetarët, për demokracinë, familjen dhe Shqipërinë. Ndaj asnjë shqetësim nuk duhet të keni,” deklaroi Berisha.
Ai sulmoi ashpër ata që sipas tij janë bërë “zhurmues në favor të Edi Ramës”, duke mashtruar dhe manipuluar elementë që kanë bashkëpunuar hapur me Partinë Socialiste.
“Ju siguroj se mbledhja ishte jashtëzakonisht e rëndësishme dhe pozitive. Nuk ka një përçarje, ju garantoj, Po pas zgjedhje të PD pati demokratë që hanë trupin me bukë dhe vrapuan u punësuan në administratën e krimit. Pati të tjerë të cilët vendosën të mos merren më me politikë, por të ndjekin jetën e tyre.
Pati të tjerë që flirtojnë me qeverinë për kontratat që kanë. Unë dua tu them ju që kjo parti ka dhe do ketë vetëm një qëllim, idealin e lirisë, rikthimin e votës së lirë. Kjo parti nuk do të qëndrojë për kontratat e asnjeriu. Kontrata jonë është me qytetarët, për demokracinë, familjen dhe Shqipërinë.
Ndaj asnjë shqetësim nuk duhet të kesh. Ata që zgjedhin për tu bërë zhurmues në favor të Edi Ramës, duke mashtruar, duke manipuluar elemente që kanë punuar haptas ndaj PS dhe deputetëve të PS. Madje kanë dalë edhe kandidatë në bashkinë e Tiranës kundër kandidatëve të PD, ata janë falls, nuk kanë asgjë të përbashkët me idealet tona. Kjo është koha e misionarëve”, tha Berisha.
