Dy nga figurat më të rëndësishme brenda institucioneve të Bashkimit Evropian, janë marrë në pyetje nga autoritetet belge në kuadër të një hetimi për mashtrim dhe parregullsi në një tender publik.
Sipas të dhënave, policia belge kreu bastisje në shërbimin e jashtëm të BE-së (EEAS) dhe në Kolegjin e Evropës në Bruksel dhe Bruges, si pjesë e hetimeve të Prokurorisë Evropiane mbi ngritjen e Akademisë Diplomatike të BE-së.
Autoritetet dyshojnë se procedurat e tenderimit për krijimin e akademisë kanë shkelur rregullat e konkurrencës së ndershme. Prokuroria Evropiane ka deklaruar se ekzistojnë “dyshime të forta” për favorizim dhe parregullsi në procesin e përzgjedhjes.
Federica Mogherini, ish-shefja e politikës së jashtme të BE-së dhe aktualisht rektore e Kolegjit të Evropës, është marrë në pyetje në lidhje me procedurat dhe rolin e saj. Ajo ka drejtuar Akademinë Diplomatike të BE-së që nga viti 2022.
Emërimi i saj në pozicionin e rektorit u debatua gjerësisht në kohën e shpalljes, pasi disa zyrtarë dhe akademikë të BE-së pretendonin se ajo nuk përmbushte kriteret e vendosura dhe kishte aplikuar pas afatit.
Po ashtu, autoritetet kanë marrë në pyetje edhe Stefano Sannino, diplomat karriere dhe zyrtar i lartë i Komisionit Evropian, aktualisht drejtor i përgjithshëm në DG MENA. Sannino ka mbajtur disa role të rëndësishme ndër vite, përfshirë atë të ambasadorit të Italisë në Spanjë dhe sekretarit të përgjithshëm të EEAS.
Statusi i çështjes
Deri në këtë fazë, as Mogherini dhe as Sannino nuk janë akuzuar zyrtarisht. Hetimet po vazhdojnë për të sqaruar plotësisht mënyrën se si është zhvilluar tenderi dhe për të identifikuar çdo përgjegjësi të mundshme.
