Gazetarja Klodiana Lala zbuloi të pathënat nga seanca në GJKKO, ditën e sotme ndaj zv/kryeministres dhe ministre e Infrastrukturës, Belinda Balluku, dhe dy vartësve të saj Gentian Gjyli dhe Erald Elezi, për të cilët gjykata la në fuqi masat e sigurisë, pezullimin nga funksionet në qeveri për zonjën Balluku dhe arrest shtëpie për Gjylin dhe Elezin.
Gazetarja tha se debatet mes Ballukut dhe gjyqtarit të GJKKO-së kanë qenë juridike ku konkretisht, Balluku ka kërkuar që GJKKO të dërgojë për gjykim incidental këtë masë në Kushtetuese.
“Në qoftë se Edi Rama ikën jashtë shtetit kush do e mbledhë qeverinë?
Gjykata i tërheq vëmendjen se po jep opinione politike.
Po mbani në arrest Erald Elezin kur duhet të jetë në krye të punëve për shkak të situatës hidrike të KESH, ka vijuar Balluku.
Po mbani në arrest shtëpie Gentian Gjylin kur situata me rrugët për shkak t motit të keq është problematike.
Ne e kemi dërguar si qeveri, duhet ta dërgoni dhe ju”, tha Lala në emisionin “Kjo Javë”.
Gazetarja theksoi se çështja nuk kufizohet vetëm te tuneli i Llogarasë apo loti 4 i Unazës së Tiranës, por përfshin edhe tendera të tjerë nën hetim.
“Balluku ka ndjekur çdo hap të procedurës, nga momenti i parë deri në shpalljen e fituesit. Kjo nuk është normale, është manipulim i barazisë së konkurrimit në tendera”, theksoi Lala në studio.
Hetimi për tunelin e Llogarasë është pothuajse në fazë përfundimtare, por SPAK ka nisur procedura të reja për lotin 4 të Unazës të Tiranës, ku dyshohet e njëjta skemë favorizimi.
“Ky rast do të zgjasë më gjatë, sepse SPAK po heton disa procedura të tjera tenderuese të Ballukut, duke përfshirë projekte të tjera infrastrukturore”, sqaroi gazetarja.
Mes provave të grumbulluara, SPAK përmend teknika proaktive si përgjimet, vëzhgimet ambientale dhe analizat digjitale, të cilat tregojnë se Balluku mund të ketë tentuar të prishë prova ose të intimidojë dëshmitarët deri në momentin kur Gjykata e Posaçme e Përgjithshme e Apelit (GJKKO) vendosi pezullimin e saj nga detyra më 20 nëntor.
