Kryetari i Partisë Demokratike, Sali Berisha, akuzoi kryeministrin Edi Rama si përgjegjësin kryesor për çështjen e tunelit të Llogarasë, duke përjashtuar zv/kryeministren Belinda Balluku nga përgjegjësia kryesore.
I ftuar në emisionin “Opinion”, Berisha tha se pas tunelit të Llogarasë qëndron “faktori kryesor Edi Rama”, i cili, sipas tij, ka drejtuar të gjitha vendimet dhe marrëveshjet që lidhen me projektin. Ai theksoi se Balluku nuk mund të kryente veprime të tilla pa miratimin e kryeministrit.
“Në mënyrën më të pakundërshtueshme, mbrapa tunelit të Llogarasë, faktori kryesor është Edi Rama. Ai e mori Ballukun dhe e çoi në Ankara.
Balluku nuk mund të shkonte kurrë të bënte pazare në Ankara, por të mos ishte kryeministri kryepazarexhiu, njeriu që bënte pazaret atje.
Ndaj dhe ne nuk mund të bëjmë të paditurin. Në fakt Balluku me pantallona është Edi Rama. Të fajësosh Lubinë që është plotësisht fjatore dhe të çlirosh Ramën si përgjegjës kryesor nuk më duket se i shërben kauzës për të cilën lufton,” deklaroi Berisha.
