Sekretariati për Procedurat, Votimet dhe Etikën në Kuvend pritet të mblidhet të hënën në orën 14:00 për të shqyrtuar dy kërkesa disiplinore nga mazhoranca dhe opozita.
Partia Socialiste ka kërkuar përjashtimin për 30 ditë nga punimet parlamentare të kryetarit të Partisë Demokratike, Sali Berisha, pas deklaratave të tij ndaj ambasadorit të BE-së në Tiranë, Silvio Gonzato, lidhur me ligjin për barazinë gjinore.
Nga ana tjetër, grupi parlamentar i Partisë Demokratike ka depozituar një kërkesë për përjashtimin e kreut të grupit socialist, Taulant Balla, për 10 ditë nga seancat plenare dhe komisionet parlamentare. Sipas opozitës, Balla ka përdorur “gjuhë fyese dhe kërcënuese” ndaj deputetëve të saj.
