Kolegji i Posaçëm i Apelimit, KPA vendosi të enjten më 6 nëntor të lërë në fuqi shkarkimin nga detyra të gjyqtarit të Tiranës, Agron Zhukri. Vendimi u mor në mënyrë unanime nga trupi gjykues i Kolegjit, i kryesuar nga Sokol Çomo, me relatore Natasha Mulaj ddhe anëtare Albana Shtylla, Ina Rama e Mimoza Tasi, pas shqyrtimit në dhomë këshillimi të ankimit të Zhukrit ndaj vendimarrjes së Komisionit. Vendimi i KPA është përfundimtar dhe ka efekt të menjëhershëm.
Gjyqtari i Gjykatës së Tiranës, Agron Zhukri nuk kishte asnjë pasuri të regjistruar në emër të tij, por bashkëshortja zotëronte pasuri të luajtshme e të paluajtshme, të krijuara gjatë martesës, në disa prej të cilave janë deklaruar si burime krijimi të ardhurat nga puna e përbashkët. Duke u bazuar në Kodin e Familjes, Komisioni i Pavarur i Kualifikimit vlerësoi se pasuritë i nënshtrohen regjimit pasuror martesor të bashkësisë ligjore, të dy bashkëshortëve. Bilanci negativ në vlerë të madhe dhe pasaktësitë në deklarimet e pasurive çuan në shkarkimin e Zhukrit nga detyra.
Agron Zhukri e filloi karrierën në sistemin e drejtësisë në vitin 1994 dhe punoi prej më shumë se dy dekadash si gjyqtar në Gjykatën e Tiranës.
