Partia Socialiste kërkon ndëshkimin e kryedemokratit Sali Berisha pas deklaratës së tij ndaj ambasadorit të BE-së, Silvio Gonzato, lidhur me ligjin për barazinë gjinore.
Në kërkesën drejtuar Komisionit të Etikës, socialistët kërkojnë që kreu demokrat të përjashtohet deri në 10 ditë, 30 apo deri në 60 ditë nga punimet e Kuvendit.
PS argumenton se deklaratat publike të Berishës një ditë më parë ishin fyese, denigruese dhe diskriminuese ndaj diplomatit evropian, duke cenuar jo vetëm dinjitetin personal të tij por edhe imazhin e institucionit të Kuvendit. Ky veprim, thotë PS, përbën shkelje të rëndë të etikës parlamentare dhe cenim të drejtpërdrejtë të parimeve të sjelljes së deputetit të përcaktuara në Kodin e Sjelljes dhe në Rregulloren e Kuvendit.
“Kërkojmë marrjen e masës disiplinore ndaj deputetit Sali Berisha, sipas parashikimeve të nenit 65/1, *Perjashtim nga pjesëmarrja ne komisione dhe/ose në seancë plenare deri në 10 ditë, 30 ditë ose 60 ditë.”, thuhet në kërkesë.
Por çfarë deklaroi Berisha dje?
Sali Berisha theksoi ditën e djeshme për mediat se projektligji për barazinë gjinore nuk vjen si direktivë e Bashkimit Europian.
Duke komentuar deklaratën e ambasadorit të BE, Silvio Gonzato, se ky votimi i këtij projektligji është direktivë e BE-së, Berisha e hodhi poshtë këtë pretendim.
“Ambasadorit të BE i them kaq, zotëri ne absolutisht ne respektojmë orientimin seksual të gjithsecilit, por përpjekjet tua për t’i imponuar shoqërisë shqiptare standarde të përkatësisë së shumëfishtë gjinore, të gjinisë në diversitet të gjerë, përveç asaj binare, dhe i them këtu, edhe në statusin tënd je binar.
Nuk merremi ne me trajtimin, ka fëmijë, ka pasur grua, ka marrë vendimet e tij më pas, siç e ka shpjeguar, se nuk dua të merrem me jetën e tij personale fare. Kështu që ligji nuk ka asgjë të përbashkët. Le t’u thotë shqiptarëve se cila direktivë e BE bën fjalë për përkatësi të shumëfishtë gjinore. Të dalë, ta nxjerrë aty”, tha Berisha.
Sipas Berishës, nga 27 vende të Bashkimit Europian, vetëm 2 shtete e kanë të miratuar një ligj si ky që po kalon në vendin tonë.
