Ish-deputetja e PS, Klotilda Bushka, në fillim të muajit shtator u mor zyrtarisht e pandehur nga SPAK nën dyshimet për kryerjen e veprës penale të “Veprime që pengojnë zbulimin e së vërtetës”.
Në dosjen e SPAK ndaj Erion Veliajt, rezulton se Klotilda Bushka ka ndikuar tek dëshmimtarja Ina Goxhaj, ish-drejtoreshë ekzekutive e qendrës BYL-A, e cila është edhe kushërirë me deputeten socialiste.
Balkans Youth Link Albania – BYL-A – është një organizatë jofitimprurëse e themeluar në vitin 2002 dhe njihet si organizata mëmë e lëvizjes MJAFT. BYL-A u drejtua nga Endri Fuga deri në vitin 2009 dhe për një periudhë të shkurtër pas dorëheqjes së tij, nga Klotilda Ferhati (Bushka). Bushka ka qenë gjithashtu anëtare bordi e organizatës.
Në vitin 2016, kur BYL-A ishte pothuajse një organizatë e fjetur, drejtoreshë ekzekutive u emërua kushërira e Bushkës, Ina Goxhaj. Megjithatë, Goxhaj i ka thënë Prokurorisë se kishte vetëm emrin si drejtuese, por pa asnjë rol. Sipas SPAK, BYL-A u kontrollua fillimisht nga Klotilda Bushka dhe pas vitit 2022 nga Ajola Xoxa.
Por, edhe pse e pandehur nga SPAK, ky fakt duket se nuk e pengon Partinë Socialiste dhe Edi Ramën që ta nxjerr në krah të Ogerta Manastirliut dhe ta angazhojë si menaxhere elektorale për të mbledhur vota, siç shfaqet edhe në videon e mëposhtme.
Ndërkohë, në një reagim pasi po hetohej nga SPAK, Klotilda Bushka pranonte faktin se i ka shok që nga fëmijëria dhe rinia Ajola Xoxën dhe Erion Veliajn.
“A jam unë shoqe që nga fëmijëria me Ajola Xoxën?
Po, dhe s’kam për ta mohuar, as harruar kurrë.
A jam unë edhe shoqe me Erjonin?
Po, që në rininë e parë dhe jam krenare edhe për miqësinë me Erjonin dhe për gjithçka ai ka bërë për Tiranën.” – shkruante Bushka në rrjetet sociale.
