Qindra qytetarë u mblodhën sot në sheshin “Skënderbej” për protestën me moton “LIRIA KA EMËR”, në mbështetje të ish-krerëve të Ushtrisë Çlirimtare të Kosovës dhe kundër Gjykatës Speciale.
Protestuesit mbajnë pankarta të shumta ku shkruhet se gjykata është raciste dhe serbo-ruse, dhe bëhet thirrje që viktimat të mos barazohen me agresorin. Një nga pankartat më të dukshme thotë:
“O të vdesim o të rrojmë, çlirimtarët t’i lirojmë! Gjykatë raciste serbe-ruse! Stop barazimit të viktimës me agresorin barbar.”
Ish-luftëtari i UÇK-së Abdulla Veseli i pranishëm në tubim duke folur për mediat theksoi se ish-udhëheqësit e UÇK-së nuk kanë kryer krime, por kanë luftuar për lirinë e Kosovës, ndërsa masakrat i atribuoi serbëve.
“Kam qenë edhe në Hagë dhe do jem në krah të mbrojtjes së lirisë së pastër. Krerët e UÇK-së që janë në Hagë janë të pafajshëm. Por dyshoj se spiunët shqiptarë i kanë çuar atje. Aktakuzat nuk qëndrojnë; janë nga Rusia e Serbia. Ne nuk kemi bërë krime, krime kanë bërë serbët,” tha Veseli.
