Shtetet e Bashkuara janë vënë në alarm pas një sulmi të madh kibernetik që ka goditur rrjetet federale të disa agjencive qeveritare. Autoritetet amerikane kanë dhënë urdhër emergjent për të forcuar mbrojtjen kibernetike, pasi hakerët kanë arritur të depërtojnë në sistemet e një prej institucioneve federale, në atë që duket si një fushatë spiunazhi ndërkombëtare.
Sipas mediave të huaja, ende nuk është konfirmuar zyrtarisht se kush qëndron pas këtij sulmi, por ekspertë të sigurisë kibernetike dyshojnë se pas tij fshihen grupe të mbështetura nga Kina, të cilat kanë shfrytëzuar dobësi të panjohura më parë në softuerin e prodhuar nga kompania Cisco.
“Ne jemi në dijeni të qindra pajisjeve të komprometuara në rrjetet federale. Ky urdhër do t’i ndihmojë agjencitë të kuptojnë përmasat e plota të sulmit”, deklaroi Chris Butera, zyrtar i lartë në Agjencinë e Sigurisë Kibernetike dhe Infrastrukturës (CISA).
Ekspertët paralajmërojnë se situata mund të përshkallëzohet. Sam Rubin, nënkryetar në kompaninë e sigurisë “Palo Alto Networks”, u shpreh se tani që dobësitë janë bërë publike, grupe të tjera kriminale mund të përpiqen t’i shfrytëzojnë.
Edhe qeveria britanike ka ngritur alarmin për një fushatë të ngjashme hakerimi, duke e cilësuar këtë si “një evolucion të rrezikshëm të metodave të mëparshme”.
Ky sulm vjen vetëm pak ditë pas një tjetër zbulimi nga firma “Mandiant”, në pronësi të Google, që identifikoi një grup tjetër hakerash të dyshuar kinezë që kishin depërtuar në kompani amerikane të softuerëve dhe zyra ligjore, për të mbledhur informacion strategjik në kuadër të luftës tregtare mes Pekinit dhe Uashingtonit
