Një 29-vjeçar është arrestuar në Tiranë, pas një operacioni që çoi në lokalizimin e tij dhe dokumentimin e një sërë veprimtarish kriminale.
I dyshuari, identifikuar si F. B., akuzohet për tentativë grabitjeje me armë ndaj një argjendarie në lagjen “Vasil Shanto” të Shkodrës, ngjarje e ndodhur më 29 gusht 2025. Ai ishte i armatosur dhe i maskuar me skafandër motomjeti.
Në momentin e ndalimit në zonën e “5 Majit”, në Tiranë, ai udhëtonte me një automjet tip “Audi” në shoqërinë e dy personave të tjerë. Gjatë kontrollit, iu gjet një sasi lënde narkotike e llojit Cannabis Sativa, e cila u sekuestrua si provë materiale.
Kontrolli në banesën e marrë me qira nga i dyshuari në Tiranë zbuloi një arsenal të rrezikshëm dhe mjete të dyshimta: një armë zjarri pistoletë, dy maska silikoni, municion luftarak, pajisje për grirjen e lëndës narkotike, si dhe 550 dollarë amerikanë fals. U sekuestruan gjithashtu dy automjete, një celular dhe një shumë parash në lekë.
Gjykata e Shkodrës kishte caktuar më herët masën e sigurisë “Arrest në burg” për veprat penale “Vjedhja me armë, mbetur në tentativë” dhe “Mbajtja pa leje dhe prodhimi i armëve, armëve shpërthyese dhe municionit”.
Dy të rinj të tjerë, Xh. D., 21 vjeç, dhe E. E., 19 vjeç, që ndodheshin në automjet me autorin në momentin e kapjes, janë arrestuar për veprën penale “Përkrahja e autorit të krimit”.
