Kanë dalë para pak çastesh rezultatet e ExitPoll-eve të para për zgjedhjet lokale të mbajtura këtë të diel në Kosovë. Sipas të dhënave që ka nxjerrë televioni T7 vetëm 4 komuna nuk kanë shkuar në balotazh.
Nga exit poll-et e publikuara nga Klan Kosova, TV Dukagjini dhe T7 rezulton se Përparim Rama nga Lidhja Demokratike e Kosovës dhe Hajrulla Çeku nga Lëvizja Vetëvendosje pritet të përballen në balotazhin e 9 nëntorit për udhëheqjen e Prishtinës. Sipas këtyre parashikimeve, Përparim Rama i LDK-së ka një epërsi të vogël ndaj Çekut.
Ndërkohë, ka dështuar ish-ministrja e Arsimit të Edi Ramës, Besa Shahini, e cila garonte nën logon e Partisë Social Demokrate, pasi sipas exit poll-eve ka marrë vetëm 1.60 % të votave.
Sipas tri exit poll-eve të publikuara nga Klan Kosova, TV Dukagjini dhe T7, në Mitrovicën e Jugut është parashikuar që Arian Tahiri nga Partia Demokratike e Kosovës ta fitojë garën në rund të parë me mbi 51 për qind të votave.
Ndërkohë, sipas parashikimeve, kandidati i Lidhjes Demokratike të Kosovës, Imri Ahmeti, pritet të fitojë në rund të parë komunën e Lipjanit.
