Procesi i votimit në zgjedhjet lokale të Kosovës po vijon me pjesëmarrje në rritje. Sipas të dhënave të fundit nga Komisioni Qendror i Zgjedhjeve (KQZ), deri në orën 13:00 kanë votuar 16.11% e qytetarëve me të drejtë vote.
Në shifra absolute, kjo përfaqëson rreth 326 mijë e 240 votues nga gjithsej 2,025,105 të regjistruar në listën zgjedhore.
Zgjedhjet po zhvillohen në 38 komuna të vendit, ku qytetarët po zgjedhin kryetarët dhe asamblistët lokalë.
Sipas KQZ-së, procesi deri më tani po zhvillohet në mënyrë të qetë dhe pa incidente madhore.
Ndërkohë, vlen të përmendet se në vetëm gjashtë komuna nuk është ndërruar partia fituese që prej zgjedhjeve të para lokale pas shpalljes së pavarësisë së Kosovës.
Në Deçan ka fituar gjithmonë Aleanca për Ardhmërinë e Kosovës (AAK); në Drenas dhe Kaçanik — Partia Demokratike e Kosovës (PDK); në Istog dhe Fushë Kosovë — Lidhja Demokratike e Kosovës (LDK); ndërsa në Mamushë, fituese ka qenë gjithnjë Partia Demokratike Turke e Kosovës (KDTP).
Procesi i votimit pritet të vazhdojë deri në orën 19:00, kur do të mbyllen qendrat e votimit në të gjithë territorin e vendit.
