Një 35-vjeçar nga Elbasani është rikthyer në qeli, pasi theu masën e sigurisë “arrest në shtëpi” dhe u kap përsëri duke shitur lëndë narkotike.
Policia njofton se shtetasi A.K., i cili ndodhej në arrest shtëpie për veprën penale “prodhimi dhe shitja e narkotikëve”, u konstatua jashtë banesës së tij në kundërshtim me vendimin e Gjykatës së Shkallës së Parë të Juridiksionit të Përgjithshëm Elbasan.
Gjatë kontrollit në banesë, forcat e posaçme “Shqiponja” sekuestruan një sasi lënde të dyshuar narkotike kokainë dhe një peshore elektronike, që shërbente për ndarjen e dozave.
Pas përfundimit të veprimeve procedurale, A.K. u arrestua dhe dosja i kaloi Prokurorisë së Elbasanit për veprat penale “largimi i të burgosurit nga vendi i qëndrimit” dhe “prodhimi dhe shitja e narkotikëve”.
