Gëzim Gjelaj nga Shkodra thotë në emisionin “Stop” se në vitin 2018 i dha me qira ambientin e një furre buke Tonin Franajt. Qiramarrësi pagoi vetëm 4 muaj qira, por nuk pagoi energjinë elektrike dhe ujin duke krijuar një borxh prej 40 milionë lekësh të vjetra ndaj OSHEE-së.
Në korrik 2020, Gjykata e Shkodrës vendosi që debitori i energjisë është Tonin Franaj, por OSHEE vazhdonte t’i kërkonte pagesën Gëzimit duke i bllokuar edhe energjinë ambientit.
Gëzim Gjelaj: Kam një debi ndaj OSHEE-së 40 milionë lekë të vjetra për shkak të ish-qiramarrësit Tonin Franaj. Unë jetoj prej 32 vitesh në Greqi. Dyqani ishte në Shqipëri dhe e kisha unë me kontratë noteriale në bazë të ligjeve të shtetit shqiptar dhe për të ndjekur këtë çështje, kam lënë avokaten time, Florinda Gjonaj.
Pas ndërhyrjes së emisionit “Stop” në Tv Klan, drejtori i OSHEE Shkodër, Armand Zhuka, premtoi ta zgjidhte situatën. Energjia u rilidh pasi avokatja e Gjelajt, Florinda Gjonaj, paraqiti vendimin e gjykatës duke nisur procedurat kundër debitorit.
Në fund, Gëzim Gjelaj falënderoi emisionin “Stop” për ndihmën në zgjidhjen e problemit.
Gëzim Gjelaj: Shumë faleminderit! Shumë faleminderit për punën që keni bërë! Jeni të nderuar!
