Prokuroria belge ka kërkuar dënim maksimal prej 20 vitesh burg për shqiptarin Ermir “Cinco” Ndreaj, një nga figurat kryesore të mafias ballkanike të kokainës, që po gjykohet në Antverp të Belgjikës. Përkrah tij, për trafikantin e njohur boshnjak Sani “Shade” Al Murdaa, prokuroria ka kërkuar 15 vite burg.
Sipas akuzës, organizata e udhëhequr nga dy të pandehurit ka kontrabanduar tonelata kokaine nga Amerika Latine drejt Europës, duke përdorur kompani “fasadë” dhe laboratorë kimikë për pastrimin e drogës.
Hetimet zbuluan se rrjeti kishte ngritur struktura të sofistikuara, ku droga “pastrohej” kimikisht për të shmangur gjurmët, ndërsa mbetjet e rrezikshme hidhnin nëpërmjet kompanive të ndërtimit që bashkëpunonin me ta.
Al Murdaa, i njohur si një nga trafikantët më të mëdhenj në Belgjikë dhe me lidhje që shtriheshin nga Kolumbia deri në Australi, konsiderohet “truri” i laboratorëve të kokainës. Ai mban nofkën “Shade” për aftësinë e tij për t’u fshehur nga policia dhe për të operuar në errësirë.
Ndërkohë, shqiptari Ermir Ndreaj, i quajtur “Cinco”, u arrestua në korrik në Tiranë dhe u ekstradua drejt Belgjikës.
Ai dyshohet se kishte rol drejtues në logjistikën e trafikut, duke organizuar transportet dhe pastrimin e parave të drogës përmes bizneseve të ndryshme në Shqipëri e Belgjikë.
