Lidhur me ngjarjen e djeshme, ku një 41-vjeçar plagosi me armë zjarri kunatin e tij (bashkëshortin e motrës), kanë rënë në pranga të dy, edhe autori edhe i lënduari.
Në kërkim sakaq, është shpallur nipi i autorit, pasi ndodhej në vendngjarje në momentin kur ndodhi plagosja.
Sipas njoftimit të policisë, i lënduari, shtetasi G.M., 54-vjeç, ushtronte dhunë fizike dhe psikologjike ndaj bashkëshortes së tij (motra e autorit të plagosjes).
“Specialistët për Hetimin e Krimeve të Rënda arrestuan shtetasit M. T., 41 vjeç, dhe G. M., 54 vjeç, pasi ditën e djeshme, në rrugën “Llambi Bonata”, në banesën e 54-vjeçarit, shtetasi M. T., pas një konflikti të çastit, ka plagosur me armë zjarri kunatin e tij, shtetasin G. M., i cili dyshohet se pak më parë kishte ushtruar dhunë fizike dhe psikologjike ndaj bashkëshortes së tij. Vijon ende puna për kapjen e shtetasit N. S. (nip i shtetasit M. T.), i cili ndodhej në banesë në momentin e ngjarjes. Arma e zjarrit u sekuestrua në cilësinë e provës materiale”, njofton policia.
Kujtojmë se ngjarja ndodhi të shtunën, rreth orës 15:40, në banesën e çiftit, në rrugën “Llambi Bonata”.
Mësohet se 54-vjeçari ka qenë duke ushtruar dhunë ndaj bashkëshortes së tij, duke sjellë kështu përfshirjen e vëllait të kësaj të fundit.
Ka qenë e dhunuara e cila ka njoftuar vëllain e saj, i cili më pas si pasojë e konfliktit ka përshkallëzuar e gjitha në përplasje fizike e më pas me plagosje me armë zjarri.
Autori është arrestuar menjëherë dhe është sekuestruar arma e përdorur në ngjarje.
