Sekretari i Përgjithshëm i Partisë Demokratike, Flamur Noka, duke folur në emisionin “Log.” për aksionin e opozitës në legjislaturën e re, tha se opozita nuk do të ekzekutojë skenarin e bojkotit, siç ka bërë vite më parë.
Noka deklaroi se e provuan një herë bojkotin e Kuvendit dhe iu kthye në një bumerang, teksa shtoi se Edi Rama e urren parlamentin dhe bën gjithçka që ta shkatërrojë atë.
Flamur Noka: Ne kemi vendosur që të shfrytëzojmë çdo vend ku mund të bëjmë opozitarizëm dhe vendi kryesor i opozitës është parlamenti. Atje ne përçojmë vullnetin dhe zërin e qytetarëve. Ta harrojë kush se ne kemi për t’i lënë hapësirat bosh, e provuam një herë, na u kthye boomerang dhe kemi 7, 8 vjet që nuk po e marrim akoma veten nga ajo dhe nuk ndodh më.
Ka dy kuvende kombëtare të PD-së që është i 11 dhjetorit 2021 dhe 30 prillit 2022 që ka miratuar dy rezoluta që ndalojnë bojkotin e forcës tonë politike. Ne do jemi aty dhe do përballemi aty dhe kudo për të mbrojtur lirinë, demokracinë dhe kushtetutën e këtij vendi.
Edi Rama e urren Parlamentin, apo po bën gjithçka që ta rrënojë dhe ta shkatërrojë atë parlament dhe parlamentarizmin në Shqipëri. Ai ka një kompleks të madh, kompleksin e unit. Gjithë bota për atë duhet të rrotullohet rreth atij. Të gjithë kabinetin e konsideron si avatar, të gjithë shtetin e konsideron si tufë.
